Albino Manca est s’artista de sos duos mundos. S’arte sua at signadu unu sèculu, e bolat peri su mundu dae Roma a New York a Tertenia, ue oe, cun sas alas de s’àbbila sua, faghet sa torrada.
Sàbadu coladu, su 31 de maju, s’amministratzione comunale de Tertenia at inauguradu s’aberidura noa de su Museo ALMA – Museo Civico de Arte Moderna e Cuntemporanea Albino Manca, un’ispàtziu totu dedicadu a sa figura e a s’òpera de s’iscultore terteniesu Albino Manca (1898–1976). A pustis de un’interventu de riprogetatzione museogràfica, su museu at torradu a abèrrere a su pùblicu cun un’allestimentu permanente nou chi contat, in ses aposentos divididos in duos pianos, sa vida e su percursu artìsticu de s’autore, ativu intre s’Itàlia e sos Istados Unidos.
Su progetu sientìficu, contivigiadu dae s’istòrica de s’arte Antonella Camarda in collaboratzione cun s’architetu Alessandro Floris pro s’allestimentu, torrat una narratzione rica e interessante de su mundu creativu de Manca: dae sos primos passos in Tertenia e in Roma, a sa resessida otenta de s’àtera ala de s’otzèanu, finas a sas òperas prus ìntimas e personales.
Durante sa tzerimònia inaugurale, su sìndigu Giulio Murgia at sutaliniadu su valore culturale e simbòlicu de s’eventu: «Cun sa riapertura de su Museo ALMA torramus a sa comunidade unu logu de memòria, identidade e connoschimentu. Est unu passu de giudu pro afortiare s’acàpiu intre s’istòria nostra e su benidore de su territòriu».
Intre sos momentos prus apretziados de su percursu espositivu nou, sa sala dedicada a sa Diving Eagle, s’òpera prus famada de Manca, cuncordada pro s’East Coast Memorial de New York e inaugurada in su 1963 dae John F. Kennedy. Botzetos originales, progetos e una versione rara sa famada àbbila de brunzu.
Sas àteras tretos espositivos esplorant sa produtzione manna de s’artista: dae sos botzetos e disinnos, a sa medaglìstica e orarati, finas a s’iscultura sagrada e animalier. De grandu significu sas òperas comente sa Fanciulla dormiente (1934), Gazzella e fico d’India (1936) e Torso di vecchio (1928), chi ammustrant sa profundidade espressiva e sa versatilidade de Manca. Ampru ispàtziu est dedicadu fintzas a sos retratos, gènere chi l’aiat bidu impinnadu intre òperas ufitziales e retratos privados, semper cun una mirada atenta a sa psicologia de sos sugetos.
S’inauguratzione at bidu sa partetzipatzione de sas autoridades locales, de sos curadores de su progetu e de medas tzitadinos, istudiosos e amantiosos de arte. Satisfadu mannu s’Assessore a sa Cultura Angelo Murgia: «Gràtzias a s’amparu de su Fondo Cultura 2021 de su Ministèriu de sa Cultura, amus pòdidu contivigiare custu traguardu de contu. Immoe nos tocat de valorizare su museu e de lu fàghere connòschere semper de prus».
Fintzas Salvatore Corrias, cussigeri regionale ogiastrinu, presente a s’inauguratzione paris a su sìndigu e a sos amministradores de su Comunu de Tertenia, at bòlidu tzelebradu s’aberidura noa cun custos faeddos: “Albino Manca est s’artista de sos duos mundos. S’arte sua at sinnadu unu sèculu, e bolat peri su mundu dae Roma a New York e Tertenia, acabta oe, cun sas alas de s’àbbila sua, at fatu sa torrada”.
Su Museu ALMA de Tertenia punnat a èssere unu puntu de riferimentu pro sa valorizatzione de sa cultura ogiastrina e de sa figura de Albino Manca, artista chi at ischidu unire raighinas sardas a una bisione internatzionale. Pro informatziones e pro prenotare sas bisitas
Museo ALMA – Via A. Dòria 12, 08047 Tertenia (NU)
0782 908037 – museoalbinomanca@comunetertenia.it
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
