Oe est su 4 de trìulas e in Amèrica festant s’indipendèntzia issoro. Sa ricurrèntzia, connota comente Independence Day o fintzas comente Fourth of July, ammentat sa firma de sa decraratzione de sas 13 colònias britànnicas, posta su 1776 in Philadelphia, Pennsylvania. E custas sunt finamentas dies chi s’ogru nostru devet istare atentu a su chi b’acontesset in Londra e in Washington.
In sa terra de Albione oe votant pro annoare sos 650 sègios de sa Càmera de sos Comunes. Su disafiu est intre sos cunservadores de su primu ministru uscente Rishi Sunak e sos laburistas de Keir Starmer chi, si narat, diant dèvere otènnere una majoria bastante de votos pro pòdere guvernare. Ma si narat finamentas chi sos liberal-democràticos de Ed Davey nch’ant a brincare a sos tories e chi, in casu de hung parliament, sena majorias bastantes, s’ant a pòdere alleare cun sos laburistas. In custa ipòtesi Sunak abarrat primu ministru pro bìdere si resesset a formare unu guvernu de minoria. Si non bi resesset si dimitit lassende su logu a sos binchidores relativos. A propòsitu: de Sunak si narat chi non diat bìnchere in su collègiu suo de Richmond and Northallerton e su matessi diat pòdere sutzèdere a unos cantos ministros suos. Chie imbetzes diat pòdere intrare a palatzu de Westmister est Nigel Farage a pustis de b’àere proadu in antis, de badas, àteras sete bias.
In Amèrica sighit imbetzes sa cuntierra intre su presidente uscente Joe Biden, democràticu, e su republicanu Donald Trump chi punnat a torrare a sa domo arba. Sas acontèssidas giuditziàrias de su boss reatzionàriu sunt prus chi non nòdidas ma est capatze chi si presentent a sos eletores comente rechisitos de meressimentu, bidende in Trump un’òmine capatze de disafiare su deep state Usa. S’idea est chi non b’apat àpidu mègius publitzidade de sos protzessos contra a isse. A s’àtera ala sas cunditziones precàrias de su presidente, chi at produidu sa peus performance sua sa chida colada in sa Bbc. Su partidu suo e sos poderios chi sunt parte de s’establishment in birbìllios sunt: editoriales, cussìgios, sondàgios etc. B’at chie l’est narende de si retirare pro lassare su logu a chie no ischimus bene, sende chi sos giornales italianos sunt faeddende de Michelle Obama o de Kamala Harris. Ma no est sa prima bia chi sos giornales italianos bident su chi nemmancu b’est.
Nos agiornamus pro faeddare de sas eletzione inglesas a contos bene fatos. Ma fintzas de sas frantzesas.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
