Sa noa est de custas dies coladas: Christie’s at postu a s’asta tres brunzetos nuraghesos, unu artzeri, unu gherradore e unu satzerdote, cun unu prètziu de partèntzia intre is 6.000 e is 18.000 èuros.
S’Assòtziu Nurnet APS, tando, at detzisu de intervènnere cun unu crowdfunding, est a nàrrere una colleta pro comporare a su mancu su brunzetu prus a baratu, sa fèmina satzerdote posta a s’incantu a 5.820 èuros.
Gianteris est arribada sa cunfirma: Nurnet s’at agiudicadu sa Sacerdotessa “Aruspice” pro 7.000 isterlinas, est a nàrrere unos 12.000 èuros, cunsiderados is dàtzios, is cummisiones e s’IVA. Su resurtadu est meritu de prus a mancu 150 donadores privados chi ant dadu ognunu su chi at pòdidu pro torrare a batire su brunzetu a domo sua.
S’artzeri, imbetzes, est lòmpidu a unu prètziu finale de 29.300 èuros, meda prus de su chi si pensaiat.
S’initziativa di Nurnet s’insertat in intro de unu movimentu de “restorative archaeology”, est a nàrrere de “torradura” de is repertos archeològiocos isulanos pro mèdiu de una mobilitazione tzìvica e digitale. “Pensamus – ant naradu is de Nuret in su situ ufitziale cosa issoro – ca siat pretzisu interessare totu is sardos. Is istitutziones non tenent regulamentos chi permitent de pigare interventos in presse, pro custu amus detzisu de intervènnere deretu nois, cun dinare de is sòtzios e cun is de is donatziones de is apassionados”.
Como s’assòtziu tenet idea de nche intregare in manera ufitziale s’istatuedda a un’istitutzione pùblica, pro more chi siat arrimada in unu museu e esposta a su pùblicu cun una targa: “achistadu cun su dinari de is sardos de sentidu tzìvicu bonu, a pustis chi dd’ant disterradu e furadu”.
Is brunzetos nuraghesos, istatueddas de brunzu fatas intre su is sèculos XII-VI a.C. comente ofertas votivas, rapresentant figuras de òmines e fèminas o elementos simbòlicos comente animales, naes e carros. Su prus ddas ant agatadas in is tumbas e in tempio nuràgicos sardos, ma calicunu repertu dd’ant agatadu fintzas foras de Sardigna, comente in Toscana e in su Làtziu, a testimonia de sa rete de tràficos chi is nuraghesos aiant cun is àteros pòpulos mediterràneos.
Medas de custos repertos, agatados in is iscavos de s’Otighentos, apartenent a colletzionistas privados e istitutziones museales de foras. Àteros repertos, frutu de iscavos fatos a fura, essint ogna tantu a craru in is catalogo de is astas internatzionales, comente is de Christie’s e Sotheby’s. Pro giustu is istitutziones sardas diant dèpere pedire a is natziones acanta s’agatant de nche ddos torrare, comente est capitadu custu freàrgiu coladu pro is 107 benes archeològicos italianos agatados dae su Cumandu Carabineris pro s’Amparu de su Patrimòniu in is gallerias de arte, butegas de anticuariadu e fintzas in is museos americanos, inglesos e isvìtzeros.
In s’ora, a su mancu in Sardigna, tocat a fàghere afidamentu a su sentidu de apartenèntzia de su pòpulu e a custas regortas ispontàneas de dinari, a su mancu finas a ue si podet lòmpere.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
