Dexi diis intre proietzionis, workshop, performance, atòbius e itineràrius po celebrari sa passioni po su tzìnema, cussa po su mari, e torrai a batiri innantis sa candidadura de s’Alighera a Tzitadi de su Tzìnema. De su 4 a su 13 de triulas ddoe at “Cinema delle Terre del Mare”. Festival po is amantis de su tzìnema in movimentu, pensau e organizau de sa Sotziedadi Umanitària de s’Alighera cun sa diretziòni artìstica de Alessandra Sento.
Arribau a sa de cuatòrdixi editzionis, su festival ocannu si fait prus mannu e portat is proietzionis suas no sceti in sa costa de s’Alighera, aundi is apuntamentus s’ant a fai in su cumplessu culturali stòricu de Lo Quarter e in is marinas de Santu Juanni, Punta Negra e Le Bombarde, ma puru prus a in antis, cun atòbius po sa prima borta in Casteddu Sardu e Istintinu.
