Est cumintzada in totu sos comunos de sa Sardigna sa regorta de sas firmas pro sustentare sa proposta de lege “Pratobello”, chi tenet sa punna de parare fronte a sas ispeculatziones in su setore de sas energias rennoaditzas. Custa initziativa, promòvida dae unu grustu de sìndigos ghiados dae su primu tzitadinu de Orgòsolo, Pasquale Mereu, naschet comente risposta a sa moratòria aprovada dae sa Regione, chi segundu sos promotores, diat pòdere èssere impugnada dae s’Istadu.
S’initziativa cheret superare sas deghe mìgia firmas prevìdidas dae s’Istatutu sardu pro sas propostas de lege de initziativa populare. S’obietivu est su de sensibilizare sa populatzione subra s’arriscu de un’invasione de palas eòlicas e de pannellos fotovoltàicos. S’ùnica manera chi tenimus pro evitare custu, est s’aplicatzione de s’artìculu 3, lìtera “f”, de s’Istatutu, chi narat ca sa cumpetèntzia primària in matèria de edilìtzia e urbanìstica est de sa Regione.
Sos tzitadinos podent firmare sa proposta de lege in sos ufìtzios comunales finas a su 30 de cabudanni. S’at a pòdere firmare fintzas in sas mesas ammaniadas in totu sa Sardigna dae sos 18 comitados contra s’ispeculatzione energètica, gràtzias puru a s’agiudu de s’Anci, de sos sìndigos e de sos cunsigeris comunales chi ant a tzertificare sas firmas.
Cando s’at a lòmpere a deghe mìgia firmas, sa lege “Pratobello” at a èssere presentada a su Cussìgiu regionale. Su testu at a èssere esaminadu e discutidu primu in sas cummissiones cumpetentes e posca in Àula.
A su cumintzu, petzi una bintina de sìndigos aiant aderidu. Como, gràtzias a s’òpera de sensibilizatzione de sos comitados, belle totu sos sìndigos de sa Sardigna ant detzìdidu de sustentare sa proposta. “Pensamus chi sa moratòria regionale non siat bastante pro risòlvere su problema,” at naradu a s’Ansa Pasquale Mereu, sìndigu de Orgòsolo e su printziapale promotore de s’initziativa. “Su decretu Draghi superat sas moratòrias, ma custa lege diat pòdere costituire una base forte chi sa Regione diat pòdere megiorare”.
–
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
