A podent torrare a logu issoro sas artes populares de Sardigna? Su chi ant fatu finas a pagas a dies a como cun sa rassigna In Tzilleri nos diat pòdere nàrrere chi emmo. Ca, comintzada in Iscanu su de 10 de trìulas e sighida in Golothene, Lodine, Urtei, Monti e Lòcula, sa manifestatzione aprontada dae s’Isre in intro de su progetu Istèrridas, custu at fatu.
In sos tzilleris de cussas biddas b’ant cantadu sèighi grupos de càntigu intre sos de su logu e sos istràngios: “Sas Bàtoro Colonnas” de Iscanu, su “Santu Laretu” de Silanos, su “Pòpulu sardu” de Ulìana, sos “Santu Bachis” e “Tottoi Zobbe” de Golothene, “Su Hussertu de Mamujada”, “Sos Bator Moros” de Fonne, “Su Tenore de Lodine”, “S’Arvorinu”, su “Antoni Milia” de Orosei, “Su Tenore Montinu”, “Su cuntratu de Sèneghe”, su “Sa Maddalena” de Silanos, su “Santu Pretu” de Lòcula, su “Janna Bentosa” de Nùgoro e su “Santu Gavinu” de Illorai.
Ma non custos ebbia, ca cada apuntamentu fiat s’ocasione pro pesare formatziones noas fatas in cue etotu intre apassionados e cumpetentes. Su pùblicu fiat su de sos tzilleris e duncas de pagas deghinas de persones. Custu at agiudadu s’informalidade, mancari sos eventos fiant programmados e duncas formales.
Narat Bustianu Pilosu, coordinadore de sa rete de su càntigu a tenore -: «Semus chirchende de recuperare àteros logos comente sas festas in su sartu, sas barracas in sas festas de sas biddas e àteros cuntestos inue su càntigu s’est isvilupadu e reproduidu». E, fìamus narende, sas àteras artes? «Fintzas su càntigu a chiterra est una cosa chi diamus pòdere fàghere peri sos tzilleris. In antis fiat cosa possìbile a b’aerent una chiterra apicada in intro. Si beniat bene e b’aiat chiterrista e cantadores non bi pensaiant duas bortas». Sa poesia improvisada, imbetzes? «Fintzas pro custa arte bi diat chèrrere una forma simigiante pro chi chie timet de artziare a palcu potzat cantare in mesu de sa gente e cun meda prus libertade. Mancari no in su tzilleri».
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
