Fintzas in Berlinu su Casteddu at retzidu un’imprassu mannu dae is tifosos suos. In ocasione de sa partida amistiosa de su 2 de austu contra s’Union Berlin, acabada cun su resurtadu de 2-2, una rapresentàntzia de is tzìrculos sardos in Germània at pòdidu assìstere a sa partida e addobiare unos cantos giogadores e dirigentes de sa sotziedade isulana.
Sa trasferta dd’at ammaniada Gianni Masia, vitzepresidente de sa Federatzione de is Tzìrculos Sardos in Germània e presidente de su Tzentru Culturale Sardu «Su Nuraghe» de Amburgu. Gràtzias a sa collaboratzione cun sa dirigèntzia de su Casteddu, Masia est resèssidu a coordinare sa partetzipatzione de una truma de rapresentantes de is tzìrculos sardos, arribbados dae diversas tzitades tedescas pro bìvere paris una die de s’isport e de identidade sarda.
Tra is medas tifosos presentes a sa partida, duncas, ddoe fiant fintzas sustenidores meda de su Casteddu acudidos prus che totu dae is tzitades de Wolfsburg, Istocarda, Mönchengladbach e dae àteras localidades tedescas. Una partetzipatzione manna chi at cunfirmadu, torra, ligàmene forte intre su Casteddu e sa comunidade sarda de su disterru.
In antis de sa partida cun su Fußballclub Union Berlin, s’iscuadra sarda at retzidu in albergu una rapresentàntzia de is apassionados sardos chi istant in Germània. Ddos ant addobiados s’amministradore delegadu Stefano Melis, su diretore isportivu Pietro Accardi, su segretàriu generale isportivu Matteo Stagno, Roberto Muzzi de s’Àrea Scouting e una rapresentàntzia de s’iscuadra formada dae su capitanu Alessandro Deiola, Gabriele Zappa, Alessandro Romano e Nicola Grandu.
A s’addòbiu fiant presentes su Tzìrculu Sardu de Berlinu e su Tzentru Culturale Sardu «Su Nuraghe» de Amburgu, rapresentados dae is relativos presidentes Lorenzo Deidda e Gianni Masia, paris cun sa responsàbile Giòvanos de sa Federatzione, Carolina Bacciu.
In campu, pro sa de tres partidas amistosas de s’istajone, su Casteddu est caladu cun Caprile, Winks, Romano, Adopo, Fazzini, Deiola, J. Rodríguez, Borrelli, Zé Pedro, Obert, Trepy, a Fabio Pisacane in banchita. Sa partida s’est agabbada 2-2, ma de su resurtadu nemos nd’at tentu contu, pro more de su brègiu de is tifosos de su Casteddu chi ant trasformadu una trasferta in Germània in una festa.
«Pro chie, comente a nois, istat in s’èsteru – at naradu Gianni Masia – su Casteddu rapresentat meda prus de un’iscuadra de fùbbalu. Est unu sìmbulu de s’identidade nostra, de is raighinas nostras e de s’acàpiu forte cun sa Sardigna. Pro custu sa risposta de is emigrados est istada istravanada. Su cuntentu e su calore issoro si podiat intèndere in ispaltos. Amus bìvidu un’esperièntzia bella a beru».
Pro Masia no est sa primu bia chi cuncordat un’addòbiu de su Casteddu in Germània. «Ocannu coladu apo tentu s’oportunidade de organizare e coordinare sa trasferta in ocasione de sa partida de su Casteddu contra s’Hannover. Ocannu, gràtzias a s’esperièntziade ocannu coladu est istadu prus simpre coordinare is tzìrculos e organizare sa partetzipatzione a s’amistosu contra s’Union Berlinu. S’amighèntzia cun unos cantos responsàbiles de su Casteddu, in prus, nos at agiudadu a agatare is billetes e a cuncordare s’addòbiu in albergu cun is rapresentantes de is tzìrculos sardos».
Unu raportu, custu, chi diat pòdere fintzas sighire «Ispero- at naradu Masia- chi ocannu chi benit su Casteddu potzat bènnere a giogare a Amburgu. Diat èssere unu bella emotzione: imbetzes andare nois a addobiare s’iscuadra in albergu, diant èssere issos a bènnere a nos agatare in domo nostra, in su Tzentru Culturale Sardu de Amburgu. Pro totus is sòtzios nostros diat èssere unu momentu ùnicu a beru!».
Un’invitu chi faghet cumprèndere cale siat su significu profundu de custas initziativas: mantènnere biu su ligàmene intre sa Sardigna e is comunidades suas in s’èsteru pro mèdiu de s’isport.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
