Si mutit Progetu Lakesos e punnat a sa valorizatzione de s’oferta de servìtzios turìsticos de sos territòrios de su Logudoro e Meilogu gràtzias a una rete de impresas turìsticas locales, chi traballant in sa produtzione de produtos tìpicos e de sos servìtzios. S’initziativa est istada presentada chenàbura 2 nadale in Boruta.
“Su progetu Lakesos at a otènnere su màssimu amparu de sa Provìntzia de Tàtari”. L’at afirmadu a nùmene de s’amministratzione Salvatore Saba: “Sa Provìntzia at a dare totu su suportu possìbile, ponende a disponimentu s’intrea istrutura sua”. Unu cuntzetu cumpartzidu fintzas dae Marina Masala de Sardegna Ricerche: “Su progetu Lakesos est unu de sos degheoto chi finantziemus in totu s’ìsula cun un’ispesa cumplessiva de tres milliones de èuro e est giai una resessida bìdere treghentos operadores chi traballant paris pro unu turismu sustenìbile”.
“Amus sustentadu sa rete Lakesos finas dae su cumintzu ca credemus potzat giùghere unos cantos benefìtzios” at decraradu su sìndigu de Boruta e presidente de s’Unione de Comunos de su Meilogu Silvano Arru. “Est fundamentale pro sos territòrios chi tenent pagos abitantes. Comente amministratzione semus puntende meda subra de su turismu, gràtzias fintzas a sa presèntzia in su territòriu nostru de s’abbadia de San Pietro de Sorres, chi chitzo at a èssere insertada in una retza de monastèrios europeos”. Pro Franco Branca ( manager de Lakesos) “su percursu fatu fins a como nche satisfaghet ma b’at galu traballu de fàghere2.
In su cursu de s’initziativa ant faeddadu fintzas sos rapresentantes de unas cantas impresas aderentes a sa retza comente a Maria Grazia Gambella, presidente de sa cooperativa Sa Pintadera chi dae su 1991 gestit su nuraghe de Santa Antine, Elena Chessa de s’agriturismu Pedru Caddu de Tula e Giuseppe Piras presidente de sa sotziedade Acqua Santa Lucia.
A pustis de sa presentada de su progetu de comunicatzione a banda de Sandro Usai de sa sotziedade Ablativ e de Valentina Sanna de Smart srl, s’initziativa (moderada dae sa giornalista Carla Mura) est istada serrada dae su giornalista e istudiosu de turismu Carlo Cambi chi, collegadu in videocunferèntzia, at fatu a Lakesos sos cumplimentos “suos pro s’entusiasmu e pro sa voluntade de pònnere in campu, in unu perìodu de crisi comente a custu, unu progetu de rete gasi ambitziosu”.
Sa Rete Lakesos faghet riferimentu printzipalmente a sos territòrios de sas Uniones de sos Comunos de su Logudoro e de su Meilogu ma puru a s’intreu territòriu de sos Gal Logudoro Goceano, Meilogu e Villanova. Sos comunos interessados sunt Mores, Tula, Àldara, Otieri, Patada, Itireddu e Nughedu, in su Meilogu Siligo, Bessude, Boruta, Bonnannaro, Bànari, Bonolva, Cherèmule, Cossoine, Giave, Putumajore, Semèstene, Thiesi e Turalva, e in su Villanova sos comunos de Pàdria, Rumana, Biddanoa Monteleone, Monteleone e Mara, e in Goceano sos comunos de Anela, Benetutti, Bono, Bottida, Bultei, Su Burgu, Isporalatu, Illorai e Nule.
Atividade realizada cun su contributu de sa Regione Sardigna – Imprentas 2021-2022. Lr 22/2018, art. 22
Attività realizzata col contributo della Regione Sardegna – IMPRENTAS 2021-2022. LR 22/2018, art. 22
