In s’Universidade de is Istùdios de Casteddu ant discutidu una tesi de làurea magistrale totu in sardu, unu coladòrgiu definidu dae s’ateneu «de grandu importu simbòlicu e sientìficu» ca signat su reconnoschimentu de sa limba sarda non comente ogetu de istùdiu ebbia, ma fintzas comente trastu de chirca e produtzione de sa connoschèntzia.
Protagonista est Pasqua Chessa, chi at seberadu de iscrìere e discutire sa tesi cosa sua in sardu, in intro de is progetos de chirca PeDESS e PLUREs, promòvidos dae su Dipartimentu de Lìteras, Limbas e Benes culturales. S’initziativa torrat in su percursu inghitzadu dae s’universidade pro promòvere s’educatzione plurilìngue e avalorare su patrimòniu linguìsticu de sa Sardigna.
Sa tesi tratat su tema de s’insignamentu de su sardu in is iscolas. Intre is resurtados de su traballu ddoe at sa progetatzione de un’unidade didàtica pensada pro èssere integrada in is cursos iscolàsticos e fraigada segundu is inditos de su Cuadru Comunu Europeu de Riferimentu pro is Limbas. Un’acostamentu chi mustrat comente fintzas is limbas minoritàrias potzant èssere insinnadas cun mètodos agiornados e in manera sientìfica istruturados.
Is progetos PeDESS e PLUREs, coordinados dae is dotzentes Giulia Murgia e Giulia I. Grosso e finantziados cun programas europeos, ant interessadu istudiantes de is cursos magistrales in atividade de chirca aplicada. Sa punna est sa de afortiare su ligàmene intre universidade e iscola e formare dotzentes de cras capatzos de gestire cuntestos linguìsticos cumplessos.
Is chircas isvilupadas ant analizadu is pranos formativos de is iscolas sardas, is materiales didàticos disponìbiles pro su sardu e pro àteras limbas locales, is pràticas linguìsticas adotadas in is classes. Is istùdios ant aprofundidu fintzas a is polìticas de amparu e promotzione de is limbas minoritàrias.
Pro s’Universidade de Casteddu si tratat de unu passu significativu in su percursu cara a unu modellu educativu prus inclusivu e atentu a sa pluralidade linguìstica. Sa discussione de sa tesi in sardu rapresentat difatis unu càmbiu de prospetiva: sa limba de s’ìsula intrat i s’ispàtziu acadèmicu non petzi comente patrimòniu culturale de amparare, ma comente limba biva, capatza de sustentare sa chirca sientìfica.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
