S’aiant fatu male sos contos, cun sa lòmpida de su beranu, is chi pensaiant a unu pasu de sas polèmicas ligadas a sa presèntzia o mancu de unu immaginàriu sardu particulare. Si dae su mèrcuris de lìssia amus chistionadu de su carrasegare nostru (cun s’idea chi annoas at a èssere finas peus e chi custu istiu amus torra a carignare sas chertas esòticas de sos turistas), dae pagas dies su romanzu s’est fatu criminale pro more de s’assàchiu a su portavalores in s’Aurèlia.
Sa netzessidade de marcare sa sardidade naschet inoghe etotu cun sos contos chi ant postu unu “ajò” a cariasedda de una turta de novas e de parres. Comente a nàrrere “c’è un po’ di Sardegna” in cussa rapina, in cussu isrobbatòriu. Forsis pro calicunu tocaiat a bortulare s’allega brullera de su “c’è un po’ di Siena nel Palio”. Ma sardos in Toscana non bi nd’at chi current a caddu ebbia; bi nd’at chi traballant e bi nd’andat a istudiare.
E finas cando non sunt sardos b’at carchi cosa chi torrat cun nois, tipu su geladu “S’oru de Sardigna” chi nos at fatu inchietare intre is chi bi cheriant s’atzentu grae in sa o, is chi non pensaiant chi s’oro podet finire cun sa u e is chi no ischiant dae ue si piscat su regotu (pròpiu dae su s…oru). Forsis semus torrados a su tèrmine Sardigna chi agatamus in su de sa Treccani comente topònimu fiorentinu in tretos de su riu Arnu in ue bi ghetaiant is carùmenes.
Posca est lòmpidu Roberto Saviano, e sas semplificatziones giornalìsticas nemmancu inoghe ant agiudadu. Su malu est chi ischimus èssere semplificados finas nois, a su nessi parte manna. A mesu tretu intre su “Saviano at naradu su chi narant is espertos” e su “Saviano lasset faeddare a is espertos”, che chi su problema esseret issu e is espertos nois, forsis non semus prontos a chistionare de fenòmenos che a custu.
Intre chie si faghet ammajare dae sa costante orizontale sarda priva de cabos e chie non faghet nudda pro iscontzare una narratzione chi pro tempus meda at istigmatizadu comunidades intreas, mèdiu paret chi non bi nd’apat. E si b’est podda manna leat a essire a campu.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
