Si faeddamus torra de Toscana e de Sardigna non semus a mala bògia faeddende de s’assàchiu a su portavalores in s’Aurèlia. Si las ponimus in su matessi contu, custa bia, est pro more de unu sèberu chi comintzat in una Regione e sighit in un’àtera. Ca in contu de morte assistida bi semus proende finas nois.
A la nàrrere totu canta, finas àteras Regione b’aiant proadu, e finamentas in antis de sa Toscana: petzi chi Vènetu una proposta simigiante non fiat colada; in Lombardia non fiant resèssidos nemmancu a nde faeddare; in Emìlia Romagna e Pùllia sa regulamentatzione de sa dispedida assistida l’aiant aprovada cun delìbera de Giunta sena nde faeddare in sos Cussìgios.
Duncas, torrende a nois, in Casteddu cherent fàghere una lege comente ant fatu in Frorèntzia. In Cussìgiu regionale ant depositadu sa proposta, e custu est su primu passu ebbia ca issa etotu devet colare s’esame de sa Cummissione e, fatu fatu, de s’àula.
S’annùntziu l’at dadu sa presidente Alessandra Todde: «Est unu percursu chi cumpartzo cun totu sa majoria e chi, s’ispera b’est, agatet cunsensos finas in setores ampros de s’opositzione. Cun probabilidade manna, cunforma a su tempus, amus a èssere sa segunda Regione de Itàlia. Cun sa Toscana aberimus s’àidu a sas àteras rapresentende un’istìmulu mannu a tales chi su Parlamentu fatzat su dovere suo e prenet custu bòidu normativu».
In su mentres in Sardigna resurtat negadu s’atzessu a sos atos a s’assòtziu Luca Coscioni, impignadu a otènnere in totu sas Regiones sas informatziones in contu de rechestas de morte assistida lòmpidas a sas aziendas sanitàrias dae su 2020 a oe. Sa risposta est chi nânt-chi non b’at possessu de informatziones che a custa.
Ma sunt in deghe (Piemonte, Vènetu, Lombardia, Ligùria, Emìlia Romagna, Marcas, Abrutzu, Sitzìlia, Calàbria e Campània) chi l’ant giai fatu. E fintzas sa provìntzia autònoma de Boltzanu. Chimbantunu sas rechestas in totu. Tocat de cumprèndere in Sardigna.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
