In Armùngia, in su coro de su Gerrei, est cumentzadu su progetu “T*Essere insieme”, unu laboratòriu de tessidura manuale e arte pùblica promòvidu dae s’Assòtziu Casa Lussu in intro de is Cantieris Culturales de Armùngia, cun s’amparu de su Ministèriu de sa Cultura e de su Comunu de Armùngia.
Su percursu de formatzione creativa e partetzipatzione colletiva est cumentzadu custu sàbadu coladu, su 5 de abrile, e at a sighire cun addòbios noos su 12 e su 26 de abrile. Is partetzipantes ant cumintzadu a imparare is mecanismos base de sa tessidura a manu cun telàrgios a curnisa, atzufende·si in un’esperièntzia chi unit sa connoschèntzia antiga e una bisione cuntemporànea.
Su progetu agabbat su 26 de abrile cun un’interventu de arte urbana colletiva: is òperas realizadas, frutu de sa tessidura cumpartzida intre abitantes e grupos de bighinadu, ant a èssere espostas fatu de is caminos antigos de sa bidda, trasformende su tzentru istòricu de su Gerrei in una narratzione bia e partetzipada.
“T*Essere insieme” est meda de prus de unu laboratòriu de tessìngiu: faghet parte de unu protzessu de rigeneratzione culturale e sotziale chi at pigadu forma in Armùngia gràtzias a s’aficu de Tommaso Lussu, nebode de Emilio Lussu, intelletuale e polìticu fundadore de su Partidu Sardu. Tommaso, si nch’est tramudadu dae Roma a Armùngia in su 2008, trasformende in sa domo de su mannoi in unu tzentru de fainas culturales, laboratòrios e atziones de comunidade.
“Est unu sèberu bènnidu dae su profundu – at ispiegadu Tommaso in un’intervista a su Tgr – depia abarrare in Armùngia una pariga de meses ebbia, ma a sa coa sunt colados belle binti annos. Inoghe sunt nàschidas ideas noas e ligàmenes noos, e fintzas sa famìlia mea.”
Pro Lussu sa cultura e su patrimòniu immateriale podent devènnere trastos eficatzes pro parare fronte a s’ispopulamentu e torrare tzentralidade a is biddas de s’internu. “Non nos devimus illùdere chi su turismu siat su rimèdiu pro ogna cosa: est pretzisu a mòvere dae su bassu, abarrare in is territòrios, e torrare a pònnere a su tzentru is persones, mescamente is prus fràgiles.”
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
