In su mentres chi su mundu vivet cun passione s’instabilidade globale, s’assessore regionale de su Turismu, Franco Cuccureddu, paret chèrrere aplicare sa lente de su marketing fintzas a sa tragèdia bèllica. S’anàlisi sua, frisca frisca in su giornale La Nuova Sardegna, movet dae un’iscenàriu ue sas ruinas angenas nos diant pòdere agiudare: s’idea chi sas crisis de Dubai, de Doha o de su Bahrain potzant “brusiare” sa cuncurrèntzia – sende chi su mercadu “balneare premium” nât chi est su matessi – no est petzi una letura geopolìtica atrivida, ma bogat a campu unu disincantu chi pagu si cuntzìliat cun sa cumplessidade de su momentu.
A nàrrere, poi, chi su mercadu de su lussu at a seberare sa Sardigna ca prus segura de su Gulfu Pèrsicu disconnoschet unu datu elementare: su turismu de élite non chircat petzi seguridade, ma istabilidade e efitzèntzia, cuntzetos chi si pistant su murru in cara de su problema crònicu nostru de sos trasportos e cun sa crèschida de sos prejos de su carburante, cosa chi ammìtet s’assessore matessi. Ma est in contu de pertzetzione internatzionale chi sa narratzione regionale tenet pecos mannos. Cuccureddu annùntziat campagnas de comunicatzione in su New York Times pro ispiegare a sos americanos chi sa Sardigna nch’est a tesu 2.000 chilòmetros de sos teatros de gherra. Un’istrategia chi galu non cumprendimus si at a èssere prus cara chi no ingènua.
Si diat chèrrere cumbìnchere su turista americanu chi su Mediterràneu siat fatu de blocos indipendentes, cando chi imbetzes sa Sardigna abarrat unu logu prenu de dipendèntzias militares, cun polìgonos e bases chi sunt, pro definitzione, ingràgios diretos de sa màchina bèllica internatzionale. Su de bìdere s’ìsula nostra comente un’òasi de paghe a tesu dae sos arriscos est che a ignorare sa possibilidade de evolutzione repentina de sas rotas de sa gherra. Imbetzes de istare in fatu a sos flussos de s’America’s Cup e de bisare drenàgios de turistas dae sos emirados, bene diat fàghere sa Regione a la chèrrere a beru, un’ìsula de paghe.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
