Su tèrmine Pasca, in s’etimologia sua sa prus pura, cheret nàrrere passàgiu. Est su coladòrgiu dae s’iscravidade a sa libertade, dae s’iscuru de sa tumba a sa lughe de su mangianu.
Si a custu cuntzetu l’ispogiamus dae su dogma religiosu pro chi nd’abbratzemus sa potèntzia universale sua, sa resurretzione si faghet urgèntzia làica de un’umanidade chi de s’acunnortare a su declinu non nde cheret s’intesa. Oe, mirende a su praneta nostru dae s’immensidade de s’ispàtziu, diamus pòdere cumprèndere chi su passàgiu netzessàriu no est prus geogràficu, ma de cussèntzia: devimus colare dae s’era de sos muros a sa de sa cumpartzimenta.
Oe sos pòpulos sunt presoneris de pedras graes comente sas de s’isciovinismu, de sa cumpetitzione capitalìstica, de sa disparidade tecnològica e de s’acabarrada de sas resursas. Unu mundu chi possedit sos mèdios pro dare nudrimentu e contivìgiu a cada abitante suo, ma chi imbetzes sèberat de pesare barreras, est unu mundu chi vivet in su dennegu de sa vida. Sa resurretzione at a comintzare, tando, cando custas pedras ant a èssere bortuladas, non dae una fortza divina, ma dae sa voluntade polìtica de un’internatzionalismu ativu.
Su de bìdere sa Terra comente un’entidade ùnica cheret nàrrere cumprèndere chi su traballu de unu est resursa pro s’àteru, e chi sa tribulia de una natzione est s’umbra chi iscùrigat su mundu intreu. Resurretzione, duncas, cheret nàrrere torrare a pònnere a sa ritza su chi amus apetigadu. Est sa rechesta de sos pòpulos chi non pedint caridades ma giustìtzia: sa fine de su dèpidu e de sas dipendèntzias, s’atzessu a sa connoschèntzia comente bene comune, sa gestione colletiva de cussu “giardinu” immensu chi aparit in custas dies dae sas fotografias orbitales.
Non b’at resurretzione possìbile si una parte de su mundu abarrat manantiale in sa chenàbura santa de sa suferèntzia cando chi s’àtera tzèlebrat s’abbundàntzia. Est pro custu chi custa Pasca 2026 nos diat pòdere agiudare a immaginare unu guvernu comunitàriu de su praneta. Semus minudos a beru, bidos dae s’ispàtziu, ma in cussa foto b’est totu sa mannària potentziale nostra: sa fine de sas làcanas e su comintzu de s’orizonte comunu.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
