Sighi∙nos

Salude, ite ses chirchende?

Cultura

Ulassa, inaugurada sa Biennale: 23 òperas pro afortigare s’acàpiu cun sa comunidade

Su percursu “Progetto e Destino” est cumpostu dae installatziones e pinturas realizadas dae 25 artistas sardos, espostas intre sa Domu de is Cannas e s’Istatzione de s’Arte finas a su 6 de santugaine.

Pro Ulassa, sa bidda nadale de Maria Lai, domìnigu su 2 de làmpadas est istada una die chi nemos s’at a iscarèschere. Prus de 500 bisitadores ant partetzipadu a s’inauguratzione de sa primu Biennale de Arte Cuntemporànea dedicada a s’artista famada. Custu eventu, contivigiadu dae Gianni Murtas cun su comitadu sientìficu formadu dae Antonello Carboni, Chiara Manca e Damiano Rossi, at otentu una resèssida manna de pùblicu e de crìtica, puntende a devènnere un’addòbiu de importu in su panorama artìsticu regionale e natzionale.

“Torramus gràtzias de coro a totu sas persones chi sunt arribbadas a inoghe dae ogna corratzu de s’ìsula”, ant iscritu in sos canales sotziales issoro sos responsàbiles de sa Fundatzione de s’Arte.

S’initziativa, ispirada a Maria Lai e pensada dae su diretore artìsticu Gianni Murtas, si projetat cara a su benidore cun bintitrès òperas de bintighimbe artistas. ” Su de intitulare una biennale de arte a Maria Lai – ispiegat Murtas – non cheret nàrrere a chircare còpias de su traballu suo, ma cumprèndere comente unos cantos aspetos fundamentales de su percursu suo siant ancora motivu de riflessione pro artistas chi traballant in cuntestos diferentes.”

Pro su sìndigu Giovanni Soru, sa Biennale rapresentat “un’acàpiu forte cun su tempus coladu chi nos acumpàngiat cara a su futuru” No est pro de-badas cun su progetu “Borghi” pro sa rigeneratzione urbana e culturale de is biddas pitica finantziadu dae sa RAS, b’est fintzas sa Domu de is Cannas, un’istrutura belle cumpletada chi at a permìtere de devènnere unu polu de riferimentu pro s’arte cuntemporànea, in cuntatu istrintu cun s’Istatzione de s’Arte.

Sa Biennale, promòvida dae su Comunu e dae s’Istatzione de s’Arte, est istada finantziada dae s’Unione Europea a traessu de su programma NextGeneration – PNRR. Sa mustra s’at a pòdere bisitare finas a su 6 de santugaine 2024.

Sos artistas autores de sas òperas espostas sunt: Silvia Argiolas, Irene Balia, Ruggero Baragliu, Nicola Caredda, Federico Carta, Roberto Cireddu, Siro Cugusi, Roberto Fanari, Paulina Herrera Letelier, Silvia Idili, Marco Loi, Alberto Marci, Silvia Mei, Veronica Paretta, Samuele Pigliapochi, Paolo Pibi, Paola Pinna, Gianmarco Porru, Francesca Randi, Massimilano Rausa, Giuliano Sale, Stefano Serusi, Danilo Sini, Angelo Spatola, Marco Useli.

Sas fotos sunt leadas dae sa pàgina face book Fondazione Stazione dell’Arte Ulassai


Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018

De lèghere

Atualidade

In sa ASL de su Campidanu mesanu unu laboratòriu isperimentale de istimulatzione cognitiva

Tzitades e biddas

S’antigu bardianu de su Supramonte  colossos de Europa pro devènnere s’Àrbore europeu de s’annu A pustis de àere conchistadu su tìtulu de Àrbore Italianu...

Atualidade

In su sequel de su contu de su «providentzialismu mìticu» b'est sa derrota de su pùblicu

Atualidade

Su nùmene de sa Costa Smeralda est ligadu a su de Karim Aga Khan. Su prìntzipe de sos musulmanos “ismailiti nizariti”, devènnidu imàm cando...