Sa Regione Autònoma de sa Sardigna doant un’oportunidade noa a is giòvanos de orìgine sarda residentes foras de s’Ìsula cun s’avisu pro is tirotzìnios formativos in s’Ìsula cun bussas mensiles èuros e rimborsos de biàgiu.
Incurtzare is distàntzias geogràficas, afortziare su ligàmene identitàriu e betaare is bases pro su futuru de is Tzìrculos sardos in su mundu. Sa Regione Autònoma de Sardigna at publicadu s’avisu relativu a s’atzione “Radici e Mondo: Mobilità in Entrata”, in intro de programa “Sardegna Mondo Giovane – Percorsi di scambio e formazione per una nuova emigrazione e di rientro”.
S’initziativa naschet cun sa punna de favorèssere su ricàmbiu generatzionale, oferende a is levas noas de s’emigratzione sa possibilidade de intrare a is organismos diretivos de is assòtzios e de si furriare a ambasciadores de sa cultura e de s’economia isulana in su mundu.
Is ses giòvanos seletzionados ant a bìvere un’esperièntzia de formatzione in su campu de duos-tres meses acanta s’Assessoradu regionale de su Traballu o acanta is Assòtzios de Amparu de s’emigratzione. In prus ant a sighite cursos de limba italiana gestidos dae s’Universidade de Casteddu o dae àteros tzentros cualificados.
S’avisu previdet una partzidura geogràfica uguale pro garantire una rapresentàntzia globale de is comunidades sardas, assignende duos postos a giòvanos de is Tzìrculos sardos de is Paisos extra UE, duos pro s’Unione Europea e duos pro is tzìrculos presentes in Itàlia. Pro atzèdere a su programa is candidados depent tènnere tra is 18 e is 30 annos, èssere iscritos dae a su mancu dae un’annu a unu Tzìrculu sardu reconnotu e possedire unu connoschimentu orale bonu de s’italianu, chi at a èssere averguadu cun unu collòchiu, pena s’esclusione.
Sa Regione at postu unu pachete de agiudos pro reduire is ispesas de permanèntzia e is costos de biàgiu, cunforma a su logu de provenièntzia. Si previdet difatis unu rimbursu finas a 2.500 èuros pro is residentes in Paisos extra UE, finas a 500 èuros pro is Paisos de s’Unione Europea e finas a 300 èuros pro chie acudit dae is àteras regiones de Itàlia. A custu sustennu s’agiunghet una bussa de mobilidade de a su mancu 1.000 èuros a su mese pro totu sa durada de su percursu, in prus unu servìtziu de assistèntzia e acumpagnamentu de sa matessi Amministratzione regionale pro agiuare sa chirca de un’allògiu adeguadu.
Is candidaduras si podent presentare dae is 13:00 de su 4 de làmpadas 2026 finas su 31 de nadale 2026. Sa protzedura de assegnatzione est a isportellu in base a s’òrdine cronològicu de arribu, e is tèrmines de dimanda ant a èssere antitzipados in pessu chi is logos a disponimentu ant a èssere ispatzados. Casumai is pregontas lompant in su matessi momentu, s’at a dare prioridade su candidadu prus giòvanu.
Is canales candidaduras est a ddas mandare a s’indiritzu PEC lavoro@pec.regione.sardegna.it opuru a su curreu eletrònicu ordinàriu a s’indiritzu lav.emigrazione@regione.sardegna.it. Sa dimanda depet èssre acumpangiada dae su mòdulu de partetzipatzione bene compiladu, unu documentu de identidade bàlidu, su curriculum vitae agiornadu e firmadu e una lìtera motivatzionale.
Puru si non siat obbrigatòriu, is organizadores cunsìgiant de alliongiare a sa dimanda unu piticu vìdeu de presentada pro ispiegare su motivu de sa partetzipatzione.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
