Cantu est de importu sa fotografia in su giornalismu? Forsis una risposta a custa dimanda la diamus pòdere àere intrende·nche a su Palatzu de Tzitade de Casteddu, logu in ue su 3 de trìulas ant inauguradu sa mustra “Letizia Battaglia Senza Fine” dedicada a sa fotògrafa sitziliana morta su 2022.
Reconnota comente una de sas mègius figuras de sa fotografia internatzionale cuntemporànea, Battaglia teniat cun se una màchina modesta comente sa Pentax K 1000 e duas calidades mannas comente su rispetu e sa dignidade. Cun sas immàgines chi at tiradu, Letizia at postu sa firma a medas batallas polìticas e sotziales de sos annos suos.
Collaborende cun sa rivista Le Ore e cun su periòdicu Abc, pro nàrrere, at retratu sa prima manifestatzione de su movimentu feminista in Milanu, ma finamentas a Pier Paolo Pasolini in su tzìnema Turati cando chi fiat faeddende contra a sa tzensura. Gasi etotu a Dario Fo e a Franca Rame. Torrada a Sitzìlia, dae su 1974 a su 1991 at dirìgidu s’iscuadra fotogràfica de su cuotidianu L’Ora bivende in direta s’istajone mafiosa de su clan de sos corleonesos cun Totò Riina e Bernardo Provenzano cumandende a Cosa Nostra. Intre sas fotografias suas fintzas sa de sa carena priva de vida de Pier Santi Mattarella in sos bratzos de su frade, su chi como est su presidente de sa Repùblica.
Sa màfia, semper e cando, non fiat s’ùnicu argumentu suo: in su coro de Palermu connoschet richesa e povertade, sa cunvivèntzia issoro e s’indiferèntzia de sos possidentes. Sa mirada sua nch’est lòmpida a sos gùturos, a sos riones, a sos palatzos de s’aristocratzia descriende una realidade sotziale càrriga de contradditziones. Sa mustra casteddaja est aberta finas a su 26 de santugaine cun custos oràrios: dae su martis a sa domìniga dae sas 10 de mangianu a sas 8 de sero (informatziones a su 070 6776482 o iscriende a infoeprenotazioni@museicivici.it).
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
