Tres dies pro istudiare, pro sonare, s’addobiare e pro bìvere sa mùsica comente esperièntzia de crèschida personale e colletiva. Dae su 3 a su 5 de austu 2026, Seui at a acasagiare sa de tres editziones de “Contaminazioni Musicali”, su progetu promòvidu dae s’Assòtziu Culturale Banda Gioacchino Rossini de Seui, chi in custos annos est divènnidu unu de is apuntamentos musicales prus importantes de s’istade in Sardigna.
S’initziativa est nàschida cun sa punna de creare unu logu de atopu intre musicistas de edades, esperièntzias e percursos diferentes, ponende a tzentru sa formatzione, su cunfrontu e sa cumpartzidura. Unu formadu chi, a pustis de sa resessida de is duas editziones coladas, torrat cun unu programma galu prus ricu, pensadu pro istudiantes de conservatòriu, dischentes de is iscolas de mùsica, cumponentes de bandas e orchestras, professionistas, amantiosos e pro totu is chi bolent aprofundire su percursu artìsticu issoro.
Pro tres dies sa bidda s’at a furriare a laboratòriu musicale a s’abertinu. Is mangianos e is meries ant a èssere dedicados a is letzione de perfetzionamentu, a is letziones individuales e is laboratòrios de mùsica de impari, mentras a sero is caminos de su tzentru istòricu ant a acasagiare is Jam Sessions abertas a mùsicos e a pùblicu, chi in is ùrtimas editziones sunt diventadas unu de is momentos prus bellos e partetzipados de sa manifestatzione.
A cundùere su percursu formativu at a èssere una truma de docentes de esperièntzia professionale reconnora: Gabriel Rosati pro sa trumba, Mauro Piras pro is otones, Maurizio Floris pro su sassòfonu, Andrea Lai pro su clarinetu, Martina Lampis pro su flàutu traversu, Daniele Sulis pro sa bateria, Stefania Secci Rosa pro su cantu, Antonello Deriu pro sa chitarra, Mariano Tedde pro su pianoforte e Federico Fenu, chi at a coordinare is atividades de mùsica de impari.
Su progetu, però, non si firmat a s’aspetu didàticu. “Contaminazioni Musicali” bolet creare un’esperièntzia immersiva, acanta sa mùsica diventat ocasione de addòbiu intre persones, linguàgios e generatziones diferentes, favorende s’iscàmbiu de esperièntzias e sa nàschida de collaboratziones artìsticas noas. In su tempus matessi, sa manifestatzione rapresentat unìimportante ocasione de promotzione culturale e turìstica pro Seui, chi cun is eventos e sa cultura sighit a valorizare su patrimòniu istòricu, ambientale e sotziale suo.
Sa cuota de partetzipatzione est de 150 èuros e cumprendet totu su percursu formativu, in prus de su vitu e de s’allògiu pro is tres dies de sa manifestatzione. Est prevìdida fintzas sa possibilidade de partetzipare comente acumpangiadores, cun una fòmula dedicada chi cumprendet acasàgiu e atividades pro iscobèrrere su territòriu.
Cun custa tertza editzione, “Contaminazioni Musicali” cunfirmat sa voluntade de unire formatzione de calidade, valorizatzione de su territòriu e turismu esperientziale, oferende a is partetzipantes siat un’ocasione de perfetzionamentu musicale, siat un’esperièntzia de vida in su coro de sa Barbàgia de Seulu.
Is iscritziones sunt giai abertas e is postos a disponimentu sunt limitados. Pro àteras informatziones faghet a iscrìere a contaminazionimusicaliseui@gmail.com o telefonare a Stefano Gaviano a su nùmeru 349 0555187.
