Est cosa de non crèere su contu chi nde faghent de sos bolos internos chi dae pagora collegant S’Alighera cun Casteddu e Casteddu cun Terranoa. Semus a s’èpica de su progressu e, a ràglia, leghimus de cambiamentos istòricos, de solutziones pionerìsticas, de distàntzias geogràficas acurtziadas, de cuntentesa manna de chie diat pàrrere prontu a totu pro non si fàghere carchi ora de vetura o de postale.
Làstima chi custu contu èpicu torrat risposta petzi a sa lògica de cuntentare sas esigèntzias de pagos brinchende·nche de su totu sos bisòngios fitianos de su bonu de sos sardos.
Su de ispàrghere sas alas in sas àeras de sos logos nostros inghiriende sas fartas de sa rete istradale e, mescamente, ferroviària, est s’ammissione de unu fallimentu istruturale. Est s’illusione de una modernidade chi aunit sos chelos ma chi abbandonat sa terra nostra a s’isulamentu suo. A sos isulamentos suos. E puru est craru chi amus bisòngiu de un’àtera mobilidade interna, sa chi si misurat in sos binàrios, no in cuota.
Cando chi s’Euròpa curret in su ferru, sa Sardigna est paghende galu su deficit infrastruturale chi tenet raighinas in s’istòria sua, cando mudeint sos padentes nostros in traversinas pro sas ferrovias de su nord Itàlia. Unu dèpidu istòricu galu abertu, che a una ferida.
Sas comunidades sardas non tenent bisòngiu de palliativos in sas àeras, ma de una rete ferrada capillare, moderna e a tretu de nde bogare sas biddas dae sa minetza de s’ispopulamentu garantende a totu su diritu de si mòvere pro istudiare e traballare e de torrare a domo issoro, a bidda issoro.
E s’arresonu est fintzas green, ca sos àereos luant sas àeras e sos trenos nono. Su de punnare a sa rotaja no est petzi unu sèberu democràticu chi aunit sos puntos intermèdios imbetzes de nche los brincare, ma est s’ùnica risposta chi bi deghet in tempos de transitzione ambientale. Est s’ùnica risposta chi bi deghet pro menguare de meda sas emissiones de carbòniu cunforma a su trasportu cun gomma o ala fissa.
A cando una polìtica chi ponet sa chistione in agenda imbetzes de finantziare custos pagos bolos pro pagu gente?
