Binti-seti atòbius, 9 film in tres logus sìmbulu de sa tzitadi scioberaus po is proietzionis: totu est prontu po “Cinema all’Aperto-Cagliari visione di un mondo”, sa rassegna dedicada a sa de seti artis chi s’agiungit a sa programatzioni de Si Muove la Città e Carmine 2026 po s’istadi casteddaja.
Is proietzionis ant a èssiri in sa Pratza de Santu Còsimu, in s’Ortu de is Capucinus e in su Bastioni de Saint Remy. “Sa punna”, ispiegat s’assessora a sa Cultura, spetàculu e turismu Maria Francesca Chiappe, “est a favoriri su svolgimentu de programas de eventus culturalis e de spetàculu varius chi, ponendi a intru prus bixinaus, permitant sa socialitzazioni e de iscoberri logus identitàrius de sa tzitadi nostra”.
Finantziau cun 50.000 èurus, ‘Cinema all’aperto-Cagliari visione di un mondo’ donat unu cartelloni adatu po totus, fait sciri su Comun, de is pellìculas clàssicas a is arresultaus internatzionalis passendi po is film de animatzioni po is spetadoris prus piticus. A curai is pruietzionis de su lunis in pratza de Santu Còsimu at a èssiri s’assòtziu Settima Arte, chi ghiat su cineclub Greenwich: primu atòbiu su 6 de triulas, cumentzendi de is noi de su sero (21:00) cun su film de Gabriele Salvatores “Mediterraneo”. Intre de is àterus tìtulus in programa nci funt “Roma città aperta”, de Roberto Rossellini, “Il dottor Stranamore” de Stanley Kubrick, “Good Morning, Vietnam” de Barry Levinson e “La Grande Guerra” de Mario Monicelli.
Cagliari al cinema est su tema presentau de su CineTeatro Alkestis po su martis in su Bastioni de Saint Remy: una rassegna dedicada a is pellìculas giradas in citadi chi tenit sa punna de valoritzai autoris, limbàgius e immaginàrius acapiaus a su territòriu. De is clàssicus de su cìnema de s’ìsula, comenti “Tajabone” de Salvatore Mereu e “Il figlio di Bakunin” de Gianfranco Cabiddu, finas a “Piove deserto” de Daniele Maggioni, “Pesi Leggeri” de Enrico Pau, “Casteddu Sicsti” de Paolo Carboni e “Il clan dei ricciai” de Pietro Mereu, “Tutto torna” de Enrico Pitzianti, Michele De Murtas e Nicolo Falchi, passendi po is curtzus “Bar Seui” de Andrea Deidda e “Mammarranca” de Francesco Piras: unu percursu pensau po donai a is casteddajus e a is bisitadoris una bisioni diferenti a pitzu de sa tzitadi.
“Nessun dorma-Cinema sotto le stelle per piccoli sognatori” est invecis su tìtulu de sa rassegna de su mèrcuris dedicada a is prus giòvunus, in programa in s’Ortu de is Capucinus e curada de sa cooperativa Spazio 2001, chi in tzitadi ghiat su Cinema Odissea.
Puru in custu casu, nci funt tìtulus meda: intre de is àterus, “Le vacanze del piccolo Nicolas” de Laurent Tirard, “Buffalo Kids” de Juan Jesus Garcia, “Il mio amico robot” de Pablo Berger, “La principessa e l’aquila” de Otto Bell, “Una notte al museo” de Shawn Levy e “Un mostro a Parigi” de Bibo Bergeron. Totus is pruietzionis, sempri de badas e cun intrada lìbera po totus, ant a comentzai a is noi de su sero (21:00).
