In espositzione, dae su 5 a su 9 de cabudanni dae sas 18 a sas 20, sos manufatos impreados in sa bidda de su Meilogu intre ’800 e ‘900
A pustis de sa resèssida manna de “Fascas, coritos e caretas”, sos de sa Pro Loco de Tiesi torrant a “Sa domo de Don Zusepinu”, sa dimora nobiliare antiga de sos Garaos in carrera de Breta, cun una mustra noa issoro. S’apuntamentu cun “Trastes de terra” cumbinat cun sas chimbe dies chi sa bidda de su Meilogu intregat a Nostra Sennora de Seunis, est a nàrrere dae su 5 a su 9 de cabudanni, cun abertura a su pùblicu dae sas 6 a sas 8 de sero.
«Custu giru – narat sa curadora de s’espositzione Giuanna Chesseddu – amus regortu unos cantos manufatos impreados in sa bidda de su Meilogu intre s’otighentos e su noighentos. Sa matèria fundamentale est sa terra luzana trasformada dae sos artesanos di Assèmini, Aristanis e Pabillonis in padeddas, cònculos, brocas e àteros trastes chi unu tempus impreaiant cada die. Non mancant sas creatziones de artistas sardos de su noighentos, sos donos pro sos pitzinnos comporados in tempos de festa, sas giorras pro arribbare s’ògiu e pratos pregiados».
Tiesi, dae sa segunda metade de su de deghennoe sèculos, fiat sede de unos cantos ufìtzios. Pro custu, paris cun sos funtzionàrios istatales e cun sos cummertziantes locales, lompent modas e ogetos de produtzione non sarda: dae sos tessutos a sa mobìlia e a sas tzeràmicas fines e portzellanas chi, cunforma a sa disponibilidade, fiant comporadas in bidda.
«In paritzas domos – agiunghet Chesseddu – b’at difatis servìtzios de pratos, in gènere de orìgine lìgure, destinados a una clientela cun disponibilidade econòmica prus limitada, ma finas medas àteros de prègiu mannu fatos in fàbricas nòdidas tedescas e inglesas. Unu biàgiu, duncas, in sa capatzidade manna de mudare una matèria sèmplitze in unu traste ùtile e galanu».
Sa faina nch’est in intro de sas punnas de sa Pro Loco chi in Tiesi acumprit a sa funtzione de recùperu de su patrimòniu culturale, linguìsticu, naturale, paesagìsticu e monumentale locale pro mèdiu de una sèrie de publicatziones e atividades. Atividades bene collidas in su situ www.sabertula.it nàschidu dae s’esigèntzia de mustrare e de pònnere a disponimentu de chie si siat un’archìviu de immàgines, testos, vìdeos e chircas.
Sa mustra “Trastes de terra” est sa de chimbe espositziones chi sa Pro Loco (cun su grupu atuale chi est nàschidu su 2002) organizat in “Sa domo de Don Zusepinu”
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
