Gianteris a Seui ant fatu sa lòmpida unos trinta mùsicos tedescos de sa BMB Brass and Marching Banda de Eschborn. Sa permanèntzia issoro, prevìdida finas a su 7 de santugaine, s’insertat a intro de su progetu europeu “Vivere l’amiciazia musicale in Europa – Musikalische Freundschaft in Europa leben!”, nàschidu cun sa punna de acurtziare sas pessones de logos diferentes pro mèdiu de su limbàgiu universale de sa mùsica e ofèrrere a su tempus matessi un’esèmpiu cuncretu de amighèntzia, iscàmbiu culturale e coesione sotziale. S’initziativa est organizada dae su Tzìrculu culturale sardu Maria Carta de Rhein-Main, chi giughet comente presidenta sa seuesa Tiziana Deidda.
S’initziativa sighit s’esperièntzia de su mese de santugaine de s’annu coladu, cando, in s’àmbitu de sa Fiera de su Libru de Francuforte, ant tentu su primu addòbiu sa SeuinStreet Banda e sa BMB de Eschborn. Duas realidades cun istiles diferentes ma acumonadas dae una energia espressiva forte. Pro s’ocasione sas duas bandas aiant fatu duos cuntzertos: su primu in su Parcu de sas Isculturas de Eschborn, su segundu dae in antis a su Jazz-Montez de Francuforte, suta su patrotzìniu de su Cunsoladu Generale de Itàlia.
Custa borta, a retzire in Ogiastra sos mùsicos tedescos est unu calendàriu prenu de eventos chi cumprendent cuntzertos abertos a su pùblicu, proas comunas, bìsitas culturales e momentos de cumpartzimentu familiare. S’addòbiu prus istetadu est sena duda su “cuntzertu de s’amighèntzia”, in programa pro su 6 in su tzentru istòricu de Seui: un’eventu chi at a unire sos sonos de sa Germània cun sos de sa Sardigna in una festa manna cun totu sa bidda. Est prevìdida in prus sa projetzione de unu documentàriu dedicadu a Seui cun sutatìtulos in tedescu.
S’eventu est frutu de sa collaboratzione intre una rete manna de sugetos: su Tzìrculu culturale sardu Maria Carta Rhein-Main, sa BMB Brass and Marching Banda Eschborn; sa SeuinStreet Banda de Seui, su Cunsìgiu de sos Istràngios de sa tzitade de Eschborn e in prus medas sugetos istitutzionales e tziviles tedescos e italianos.
