S’iscena polìtica istadunidensa, dae un’annu dominada dae sa figura imbaratzosa e semper presente de Donal Trump, eris at tentu un’atzinnicada forte: s’eletzione de Zohran Mamdani comente sìndigu de New York City, difatis, at a tènnere cunseguèntzia mannas. Immigradu, musulmanu, democràticu-sotzialista, filopalestinesu, Mamdani at bìnchidu cun su 50,39 % de is votos.
In su discorsu suo a pustis de sa vitòria, Mamdani at mandadu una disfida a su presidente: «Donald Trump, sigomente isco ca ses castiende, tèngio bator faeddos pro tene: “Turn the volùmene up!”». (Àmpula su volùmene) at naradu, promitende chi sa tzitade de New York at a èssere «sa lughe in custu momentu de iscurigore». At definidu Trump «dèspota» e at agiuntu: «Si unu logu a su mundu podet ammustrare comente bìnchere a Donald Trump, cussu est sa tzitade chi dd’at ingendradu». «New York est una tzitade de immigrados, suportada dae immigrados e dae oe ghiada dae un’immigradu» at sighidu, afirmende in fines: «Iscurta, Trump: pro arribbare a unu de nois, as a dèpere passare in pitzu de totu nois».
Trump no at adduradu meda a ddi torrare isceda: “At bìnchidu petzi pro more ca su nùmene miu non fiat in s’ischeda”- at nau. De prus, Trump at criticadu a Mamdani mutendeddu in is canales sotziales cosa sua «my little communist mayor», est a nàrrere “su sindigheddu meu comunista”, e dd’at acusadu de èssere tropu radicale, contras a is ebreos e un’ostàculu a sa seguridade e a s’òrdine pùblicu.
Ma chie est a beru Mamdani? Nàschidu in su 1991 in Uganda, fìgiu de Mahmood Mamdani, un’acadèmicu indianu de fama, e de sa regista indianu-americana Mira Nair, at coladu sa pitzinnia sua intre Uganda, Sudàfrica e Istados Unidos. A sete annos sa famìlia sua s’est cambida a bìvere a New York e in su 2018 at otentu sa tzitadinàntzia americana. A pustis de àere frecuentadu sa Bronx High School of Science, s’est laùreadu in Istàdios africanos in su Bowdoin College, in su Maine, in su 2014. Primu de intrare in polìtica at traballadu comente consulente pro sa preventzione de is isfratos in su Queens, ue assistiat is famìlias chi arriscaiant de pèrdere sa domo. A giòvanu at tentu fintzas un’esperièntzia comente cantante rap cun s’annomìngiu de Young Cardamom; mancari issu etotu si siat semper contadu unu rapadore de sèrie C, at decraradu chi custa passione dd’est serbida pro comunicare cun sa gente in sa campagna eletorale e pro parare barra a is aversàrios. Contra de issu in sa cursa a sa càrriga de sìndigu ddoe fiant Andrew Cuomo (41,59 %) , sustentu fintzas dae Donald Trump e Elon Musk, derrotadu a is primàrias democràticas ma candidadu su matessi, e su republicanu Curtis Sliwa (7,11%), comomai destinadu a s’iscareschidòrgiu.
Sa vitòria de Mamdani no est simbòlica ebbia pro s’orìgine sua e pro sa fide sua, ma rapresentat una càmbiu cuncretu in contu de prioridades de sa polìtica tzitadina de Nova York. Su messàgiu suo no est ideològicu ebbia, ma fintzas identitàriu. Est dàbile chi custa resessida siat s’inghitzu de una fase noa fintzas a livellu natzionale, acanta is delùdidos de sa polìtica trumpiana sunt medas. Su disafiu lantzadu a Trump cun sa frase «una tzitade suportada dae immigrados e dae oe ghiada dae un’immigradu» marcat unu momentu detzisivu pro sa polìtica urbana americana e pro su ruolu de is comunidades minoritàrias in su guvernu de is tzitades mannas.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
