Sighende su contu de su Vangelu de Mateu, oe sos tres Res nche sunt lòmpidos a Betlemme de Giudea, a ue sa criadura divina, intreghende·li sos donos chi connoschimus. E gasi cada annu dae cando afestamus custa Pasca. Ma ite diant agatare torrende a cussos tretos, ocannu 2024? Una versione “remake” de s’istragu de Erode?
Dae tres meses s’assàchiu israelianu, chi a li nàrrere isproportzionadu est pagu cosa, cunforma a s’afrenta retzida su 7 de santugaine, est cajonende morte ebbia. Pagas dies a como in su situ de s’Unicef podìamus lèghere chi «Gaza est su prus perigulosu logu de su mundu pro unu pitzinnu. Die cun die custa realidade terrìbile est semper prus afortiada». Domos e ospidales ghetados a terra (e gasi etotu sos sistemas ìdricos, igiènicos e sanitàrios) sunt sa peus fotografia chi podimus retzire, ma si damus un’ograda a sos datos sa cosa est fintzas peus.
In prus de sos chi non rient prus, e chi nemmancu prus pranghent, contados a mìgias, sos chi sunt bidende custa die de Epifania sunt postos cara un’iscenàriu chi, intre maladias e maladdescu, limitadu est a lu definire infernale.
Pro nàrrere, in giru de una chida, in sa segunda metade de su mese in pessu lassadu a palas, sos casos de diarrea sunt colados dae 48 a 71mìgia. Una cosa chi torrat cun 3.200 casos noos cada die. Unu singiale malu chi nos dat a craru s’idea de comente est peorende sa salude generale de sos crios. In antis de s’ofensiva israeliana, cando Gaza fiat “petzi” una presone sena coberturas, si contaiant 2mìgia casos noos cada mese pro sos pitzinnos suta sos chimbe annos. Duncas b’amus unu +2000%.
In contu de maladdescu s’Unicef contat chi belle su 90% de sos pipios chi non lompent a sos duos annos non consumat prus de duos grupos de alimentos: laore e derivados e late. Ma est creschende sa pertzentuale de chie màndigat una cosa ebbia. Fintzas in sos mannos e in sas fèminas chi, sena diversidade alimentare, si devent illierare o chi sunt allatende. In cunditziones che a custa est limitadu finamentas a faeddare de carestia.
Epifania de morte, manifestatzione de sa gherra. Galu pro cantu?
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
