B’at istòrias in Sardigna chi cherent contadas. Istòrias chi a bortas nos current afaca non pro su bisòngiu de nde connòschere sos protagonistas ma pro su bisòngiu nostru de s’agiudu issoro. Mescamente in tempos in ue sa crisi sighit sa caminera sua bene carignada dae chie est bortulende su pagu de welfare chi galu tenimus.
In Thiniscole, in Baronia, b’at una setzione de s’Auser – assòtziu de voluntariadu nàschidu in Itàlia s’89 pro initziativa de sa Cgil – chi custu 2024 faghet 30 annos. Dae su 1994 a oe, unu tempus bastante mannu pro pòdere sestare unu bilantzu, chi giai lu dìamus pòdere lèghere pro mèdiu de sos ses veìculos parchegiados (cando non sunt a rodeu) in pratza de Crispi, su logu de sa sede issoro: un’Opel Vivaro cun noe logos a sètzere; unu Fiat Scudo, semper de 9; tres Fiat Doblò; un’Opel Combo, s’ùrtimu arrivadu.
Totu custas veturas tenent a dae in segus sa pedana automatizada pro su trasportu de disàbiles. Màchinas chi current: pro una bìsita in ospidale (fintzas a Casteddu); pro dimissiones de gente chi devet torrare a domo; pro cunsignas de cale si siat cosa bisòngiat a chie pedit agiudu.
Pro cumprèndere mègius s’impignu de sos voluntàrios thiniscolesos cheret però chi diamus un’ograda a unos cantos datos, cunfrontende su 2023 cun s’annu in antis. Si su 2022 sas veturas mentovadas ant carradu gente 3241 bortas, s’annu a pustis b’at àpidu una crèschida de 1067 atziones: 4008 in totu, cun unas deghe persones impignadas cada die. Semus faeddende de 31mìgia e 416 oras coladas, 201mìgia chilòmetros cursados e 25mìgia èuros gastados peri sos rifornidores de gasòliu.
Totu custu sena contare sas 300 bortas (3464 oras in totu) chi sas veturas las ant impreadas pro nche giùghere 1538 màndigos pro 31 mannos e 6 minores a domo issoro. Pro sos pratos caentados b’at una cunventzione cun unu ristoradore de su logu chi, abarrende anònimu, contribuit a su servìtziu. Ma sas cunsignas pertocant finamentas sos màndigos de còghere, cruos.
Sos telèfonos de sos voluntàrios de s’Auser sonant a cale si siat ora. Singiale chi in sas comunidades b’at suferèntzia. Ite singiale bi cheret a sos detzisores pro amparare sos diritos chi su pùblicu non garantit prus?
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
