In Sardigna su gasòliu immoe est prus caru de sa benzina, una cosa chi non si acontessiat dae annos. Difatis, finas a pagas dies a oe su prenu de “birde” fiat prus caru de diesel, ma segundu is ùrtimos datos de is prètzios mèdios de is distribudores de s’Ìsula, sa benzina est a 1,650 èuros a su litru, mentras su gasòliu est lòmpidu una mèdia de 1,680 èuros a su litru, est a nàrrere unos 3 tzentèsimos in prus. Custos valores còllocant sa Sardigna intre is regiones italianas cun is carburantes prus caros, mescamente pro su chi pertocat su gasòliu, apuntu. Custu est su chi nde essit a campu dae un’anàlisi de s’Unione natzionale consumadores, chi at publicadu is datos de su Mimit. Faghende unu paragone cun is àteras regiones italianas, sa Sardigna tenet prètzios de su carburante tra is prus artos respetu a sa mèdia natzionale.
A fundamentu de custu càmbiu ddoe mescamente s’agiornamentu de is atzisas de is carburantes, intradu a vigèntzia dae su 1 de ghennàrgiu 2026. Su provedimentu fiscale nou at prevìdidu una reduida de is impostas de sa benzina de unos 4 tzentèsimos a litru e, in su matessi tempus, un’aumentu de su pròpiu valore de is atzisas de su gasòliu, dèpidu prus che totu a s’eliminatzione de su sussìdiu ambientale dannosu, sende chi su diesel est cunsideradu prus incuinante de sa benzina. A su chi narat su guvernu, sa punna est sa de minimare a bellu a bellu su tassamentu de is duos carburantes, in lìnia cun critèrios de ecuidade fiscale e de polìticas ambientales.
Ma su resurtadu est ca su prètziu de su diesel s’est ampuladu, e su de sa benzina at abasciadu. A livellu natzionale si tratat de unu fenòmenu raru, chi no est torradu a acontèssere a su mancu dae freàrgiu 2023, cumentzu de sa gherra in Ucràina.
Sa crèschida de su prètziu de su gasòliu tenet cunsighèntzias diretas in sa vida de is tritadinos. Pro medas famìlias sardas, chi impreant veìculos diesel pro s’ispostare o pro traballu, s’aumentu s’est intèndidu e fintzas meda. Prus mannos sunt is efetos pro is impresas de trasportu e logìstica, chi impreant prus che totu màchinas alimentadas a gasòliu_ sa crèschida de is costos operativos arriscat de tènnere cunseguèntizas in is prètzios de is servìtzios e de is mertzes a su detàlliu.
Tocat a subènnere chi in Itàlia prus de su 50–60% de su prètziu finale de is carburantes est rapresentadu dae impostas, intre atzisas e IVA.
Segundu is analistas de su setore, s’andamentu de is prètzios de is carburantes in is meses imbenientes at a sighire a dipèndere dae tres fatores printzipales: polìticas fiscales, cuotatziones de su petròliu in is mercados internatzionales e dimanda interna de energia. In mancàntzia mudas in sa normativa o de cambiamentos mannos de su prètziu de su grègiu, custa situatzione — cun su gasòliu prus caru de sa benzina — diat pòdere sighire a su mancu in sa primu parte de su 2026.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
