A cumentzare dae chenàbura su 7 de martzu 2025 e finas a su 4 de abrile 2025, sas colletziones archeològicas de is Museos Natzionales de Casteddu ant a èssere contadas in limba sarda. Cada chenàbura, sos visitadores ant a pòdere partetzipare a bìsitas ghiadas in sardu, cun duos turnos prevìdidos a sas 17:00 e a sas 18:00, sena dèpere prenotate. S’initziativa, a tìtulu “Cenàbaras. Is Museus de Casteddu contaus in sardu”, est promòvida dae sa Diretzione Regionale Museos Natzionales Sardigna e punnat a avalorare s’impreu de su sardu comente trastu de divulgatzione culturale.
Pro sas iscolas de cada òrdine e gradu e pro sas Universidades de sa Tertza Edade faghet a prenotare sas bìsitas ghiadas fintzas a mangianu a cumentzare dae sas 9 de mangianu. S’idea est de intzentivare s’impreu de sa limba sarda intre sos giòvanos e in intro de sos percursos educativos.
Giai sàbadu coladu, su 1 de martzu, sa Diretzione Regionale Museos Natzionales de sa Sardigna paris cun sa Basìlica de Santu Sadurru, ant aparitzadu una bìsita ghiada a s’indonu in sardu in s’àrea archeològica e in sa Basìlica etotu. S’eventu, a tìtulu “Bìsita acumpangiada in sardu”, est pràghida meda a sos bisitadores de su logu e a sos turistas, sinnu de su ruolu chi sa limba sarda tenet pro sa valorizatzione de su patrimòniu istòricu e artìsticu de s’ìsula. Sas bìsitas in sardu in sa Basìlica de Santu Sadurru s’ant a repìtere ogna sàbadu de su mese a ora de sas 11:00.
A sa base de s’initziativa b’est su cumbinchimentu chi su sardu rapresentet s’espressione culturale prus arta de sa Sardigna e chi siat unu mèdiu de importu pro sa trasmissione de s’istòria e de s’identidade.
Pro nde ischire de prus de sos oràrios e de sos prètzios de sas bìsitas ghiadas: Musei Nazionali di Cagliari.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
