B’at una patologia chi in sos ùrtimos tempos est retzende sas atentziones chi meresset. Semus faeddende de sa fibromialgia, una maladia chi interessat mescamente sas fèminas adultas manifestende·si cun dolores peri sos mùsculos, sos tèndines e sos ligamentos. De prus, issa ingendrat una crèschida de sa tensione musculare inteterende paritzas sedes de s’aparatu locomotore dende grandu podda a sa persone.
No est totu, ca custos sìntomos est capatze chi siant assotziados a istorbos psichiàtricos comente depressione e ànsia. No est fàtzile a averguare sa presèntzia de sa fibromialgia. Bortas meda est capatze chi la diagnòstichent escluende·nche manu manu àteros istorbos comente s’isclerosi mùltipla es’artrite reumatòide.
Sa nova est chi fintzas pro ocannu, in Sardigna, sa Regione at finantziadu un’interventu de sustegnu. Dae su primu de abrile totu sos tzitadinos interessados, podent fàghere dimanda pro s’indennidade regionale 2024. E b’at tempus fintzas a su 30 pro la pedire a su Comune de residèntzia. Su sustegnu est de 800 èuros e lu podent retzire sos chi sunt in possessu de tzertificatzione mèiga – emìtida intro de su 30 dae unu ispetzialista abilitadu a s’esertzìtziu de sa professione e iscritu a s’albu – chi atestet sa diàgnosi. In prus de custu recuisitu tocat chi s’interessadu non siat benefitziàriu de àtera mesura de sustegnu cuntzèdida petzi pro sa diàgnosi de sa fibromialgia.
De prus, a sa dimanda cherent alliongiados sa còpia de su documentu de identidade e de sa tèssera sanitària e s’Isee ordinàriu 2024. Custu pro sas istàntzias noas. Pro sos chi ant benefitziadu de s’indennidade regionale s’annu coladu podet bastare sa rechesta giai presentada, ma est netzessàriu a cunfirmare sos recuisitos a su Comune pro mèdiu de una modulìstica apòsita cun s’Isee noa, semper intro de su 30 de abrile.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
