Torrat su Prèmiu Ostana, in sa bidda omònima piemontesa de limba e cultura otzitana. Dae su 28 a su 30 de làmpadas b’at a èssere difatis sa de sèighi editziones de su fèstival literàriu dedicadu a sas limbas de minoria e a sa diversidade linguìstica peri su mundu.
S’islogan de ocannu est Lo fuec es ancà ros dessot la brasa, est a nàrrere su fogu est galu ruju suta de sa bràsia, versu pigadu dae unu càntigu de sos annos 70 de su cantautore Dajre d’Angel. Fintzas e mescamente pro nàrrere chi sas limbas sunt bias e non nde cherent s’intesa de si nche mòrrere.
Oto sunt sas setziones de sa rassigna: Prèmiu ispetziale, Prèmiu internatzionale, Prèmiu minorias linguìsticas istòricas de Itàlia, Prèmiu limba otzitana, Prèmiu giòvanos, Prèmiu tradutzione, Prèmiu cumpositzione musicale, Prèmiu tzìnema. Oto categorias pro oto artistas chi, acumpangiados dae unu tutor, ant a colare tres dies a concruos de làmpadas in sa bidda otzitana manna 85 cristianos in pare cun su pùblicu de amantiosos in unu clima de iscàmbiu e de cunvivèntzia.
S’annu coladu ant bìnchidu su bascu Bernardo Atxaga (Prèmiu internatzionale), Hawad (Niger) de limba tamajaght (Prèmiu ispetziale), sa francu-proventzale Liliana Bertolo Boniface (pro sas minorias linguìsticas istòricas de Itàlia), s’asturiana Blanca I. Fernández Quintana (intre sos giòvanos), sa tradutora otzitana Monica Longobardi, sa tzitadina frantzesa Sarah Laurent-Zurawczak (Prèmiu limba otzitana), s’iscotzesa Fiona Mackenzie (pro sa setzione musicale), sa corsicana Julie Perreard (pro sa setzione tzinematogràfica).
Su Prèmiu Ostana – chi est fintzas una proposta di turismu culturale chi aunit sos logos montanos cun s’architetura, sa literadura cun sa mùsica e cun su tzìnema a pees de su Monviso – est una faina de s’assòtziu culturale Chambra d’oc cun su sustegnu de su Comune de Ostana, de sa Regione Piemonte, de s’Insitut Occitan de Cultura, de Pen club Occitan, de Ràdio Lenga d’Òc, de sas fundatziones CRC e CRT e de ATL Cuneo.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
