Su Treninu Birde est connotu oe comente mèdiu de trasportu turìsticu chi permitit a sardos e istràngios de iscobèrrere sos corratzos prus cuados e dechidos de sa sa Sardigna. Ma a palas de cussos logos ispantosos b’at contos e istòrias chi non totus connoschent. Custos contados, ambientados fatu de sa trata istòrica Mandas-Làconi, ant a èssere sos protagonistas de s’ùrtimu traballu de Luca Lobina, chi in su curtumetràgiu suo amèscurat istòrias familiares, amighèntzias e traditziones locales, oferende una riflessione contina intre su passadu e su presente.
In su curtzumetràgiu nou de Lobina, chi torrat a sa regia a pustis de su curtzu “Pissiafoi” giradu in sa bidda ispèrdia de Gàiru Betza, su trenu leat unu ruolu simbòlicu: no est unu mèdiu de trasportu ebbia, ma divenit su filu chi acàpiat istòrias de vida, relatziones e memòria. Su biàgiu matessi rapresentat un’ocasione pro esplorare sos raportos umanos, cun su paisàgiu chi si fùrriat a ispigru de sos sentidos de sos protagonistas. Un’aspetu tzentrale de sa pellìcula at a èssere sa valorizatzione de sas traditziones sardas A traessu de s’iscoberta de sas usàntzias antigas, su film afrontat temas universales comente s’identidade, s’amentu e s’apartenèntzia.
Su curtzumetràgiu, chi at a essire in su 2025, at a èssere unu biàgiu in su coro de sa cultura de s’ìsula, un’iscumbata subra sas raighinas chi, puru in unu mundu modernu, sighint a bìvere in sos rituales fitianos, in sas tzelebratziones e in sos contos de foghile. In custu cuntestu, su trenu est comente unu ponte intre passadu e presente, intre sa lestresa de sa vida de oe e sos regordos de su tempus coladu chi a bellu a bellu essint a pìgiu. s’essèntzia autèntica de sa Sardigna.
Su sèberu de sa lìnia Mandas-Làconi no est pro de badas: paisàgios istravanados e su patrimòniu istòricu de custu tretu de ferrovia, sunt su logu perfetu pro contare un’istòria intre cuntemporaneidade e atigòriu.
Duncas, in un’època dominada dae sa tecnologia e dae sa presse, su film, in faimentu gràtzias a sa collaboratzione cun s’Azienda regionale de trasportos Arst Spa, si proponet comente una riflessione subra de sa netzessidade de torrare a iscobèrrere sas raighinas nostra e abrandare su ritmu de sa vida.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
