Terreni d’Incontro, fèstival de teatru, mùsica, cultura e artes visivas, torrat in Nùgoro pro sa segunda editzione serrende·bi·la como cun sas atividades dedicadas a s’arte sonora cun tres dies: s’11, su 13 e su 25 de custu mese.
In programma pro sa prima data b’amus sa mùsica eletrònica de Danilo Casti cun sa boghe ipnòtica e ammajadora de Dalila Kayros. Sos duos artistas est dae tempus chi giughent a dae in antis custu progetu chi nch’at bàrigadu sos mares a inghìriu nostru lompende·nche a Europa, Istados unidos e Mèssicu. Sos branos in s’iscalita issoro sunt mescamente sos de su discu “Animàmi” de su 2022, publicadu dae sa Subsound records. Fatu fatu b’est sa seletzione dark, gothic, emb e industrial de Ravenant.
Dominiga su 13 si comintzat cun su metallu èpicu de sos Icy Steel, grupu influentzadu dae sas sonoridades tzèlticas e chi pro s’ocasione at a presentare su discu “The Wait, the Choice and the Bravery”, su de ses de sa carriera issoro. In fatu issoro tocat a sos Ilienses de Mauro Medde e de Natascia Talloru (is sa foto de Gianfranco Delussu), progetu dark-ambient-folk de màdrighe esotèrica e nuràgica. Sa còpia barbaritzina est a probe de essire cun su segundu album issoro “Jae”, tìtulu pigadu dae sos versos de tiu Remundu Piras.
Chenàbura su 25 torra metal cun su cuntzertu de sos Rod Sacred, formatzione istòrica de s’iscena Hard & Heavy sarda nàschida sos primos annos otanta. Su cuntzertu issoro, in prus de pònnere in elencu sos clàssicos de su repertòriu, at a èssere ocasione pro presentare sos cumponimentos presentes in s’ùrtimu discu “Another Day” de su 2023. Comente serrant issos tocat a Agostino Chironi a cuidare una seletzione dj de branos in lìnia cun su tràgiu de su sero.
Sos eventos sunt in su live pub Killtime de carrera de Mereu 45 cun abertura a sas 8 de sero. Su programma a minudu est possìbile a lu bìdere dae su situ terrenidincontro.it.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
