Cunsensu pro donare is òrganos. Casteddu a in antis in Italia

Casteddu, tra sas mannas tzitades, est sa prus virtudosa de Itàlia segundu s’Inditze de su Dono 2019, su raportu elaboradu dae su Tzentru natzionale trapiantos pro valutare sos resurtados de sa regorta de sos decraros de voluntades a sa lassa de òrganos.

Is datos sunt pigados dae is pràticas pro su rinnovu de sa carta de identidade eletrònica. In su 2019 sos cunsensos in su cabulogu sardu ant coladu su 79%. “Is casteddaios ant demustradu unu mannu sensu de tziviltade, solidaridade e generosidade” narat s’assessora a sos Afares Generale de su Comunu, Rita Dedola. Pro custu s’amministratzione at pigau unu reconnoschimentu dae su Tzentru natzionale trapiantos e dae s’Assòtziu natzionale ufitziales de Anagrafe e Istadu Tzivile. “Semus cuntentos meda de àere contribuidu a sa resessida de custu progetu. Su Comunu de Casteddu – concluit Dedola – at aderidu a s’initziativa finas dae su 2014″.

Tra sas mannas tzitades de Itàlia, Casteddu est difatis sa chi prus de totus at collidu decraros de voluntades a sa lassa de òrganos pro mèdiu de su rinnovu de sa carta de identidade eletrònica. In fatu nche sunt Tàtari e Pordenone.

Prus in generale andat bene su resurtu de sos 5 cabulogos sardos, chi s’agatant totus intro sas primas 8 positziones. Prus pagu artos sos balores de sas tzitades prus mannas: su resurtadu mègius est cuddu de Firenze (17ma), mentras Milanu est 57ma, Roma 64ma e Torinu 75ma. Belle totus tzentru-meridionales sos cabulogos cun sos inditzes de su donu prus bàscios: Nàpoli est in sa positzione 104, mentras cùngiant sa classìfica Foggia, Crotone e Teramo. Su gap tra Nord e Sud istupat fintzas in su cunfrontu tra sas regiones: s’inditze prus artu de su 2019 ddu tenit sa Badde de Aosta, sighida dae sa Provìntzia autònoma de Trentu e de sa Sardigna. Sas realidades meridionales si còllocant imbetzes totus a suta de sa mèdia natzionale, in piessigna Campània, Sitzìlia e Calàbria, totus cun tassos de cunsensu inferiores a su 60%.

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.