Si narat “Ottone Bacaredda e il sogno della città nuova. Cagliari tra Ottocento e Novecento” su progetu promòvidu dae s’Assessoradu a sa Cultura e Ispetàculu de su Comunu de Casteddu chi tra santandria e nadale at a ammentare sa figura istòrica importante meda de Ottone Bacaredda, su sìndigu chi aiat ghiadu s’amministratzione comunale casteddaja pro su bellu de chimbe legisladuras e chi, tra ‘800 e ‘900, aiat donadu inghitzu a un’òpera manna de modernizatzione de sa tzitade.
Difatis su nùmene de Bacaredda est acapiadu a istrintu cun su fàbricu de medas òperas pùblicas, iscolas elementares e superiores, sa rete ìdrica e sas fognaduras, sos impiantos de illuminatzione, su mercadu de Largo Carlo Felice, sos pòrticos de bia de Roma, su Palatzu Tzìvicu nou e su Bastione de Saint Remy.
Intre santandria e nadale duncas b’at a àere unu programma prenu de initziativas promòvidas dae s’Assessoradu etotu acostagiadu dae medas assòtzios chi ant a contribuire, cun progetos finantziados dae bandos, a diversificare sas propostas. Sas tzelebratziones s’ant a acumprire in sos logos chi aiant caraterizadu sas fases de sa vida, de su traballu e de sa faina de Ottone Bacaredda (1848-1921), comente su Bastione de Saint Remy, sa Passigiada Coberta, su Palatzu Tzìvivu, pro nde remonare calicunu ebbia.
Sa figura de s’ex sìndigu at a èssere regordada cun mustras de artes visivas, projetziones de imàgines istòricas, cunvegnos, bìsitas ghiadas, fainas laboratoriales creativas e literàrias, ispetàculos teatrales e musicales, isfiladas de costùmenes istòricos e automòbiles de època e produtziones radiofònicas originales, chi ant a interessare totus in una festa de pòpulu aberta a totus.
Fotografias antigas, documentos inèditos de archìviu, filmados ant a permìtere de torrare a cumpònnere in manera fidele custu perìodu istòricu, pro contare de sas contradditziones de un’època chi dae una banda castiaiat cun isperu e cuntentu a sos bisos, a su lugore e a sos istìmulos de sa Belle Époque frantzesa, dae s’àtera depiat fàghere sos contos cun sa crisi econòmica de agabbu de sèculu, chi aiat tentu cunseguèntzias fungudas fintzas in s’ìsula.
“Cun custa tzelebratzione importante amus a giùghere su sìndigu Bacaredda in su coro de sos casteddajos e de sos prus giòvanos- at naradu su sìndigu Paolo Truzzu-. Est dovere nostru torrare a lèghere s’òpera de s’òmine, de su polìticu, de s’amministradore, de su fraigadore sena pasu e innovadore. Oe chi sas tzitades sunt devènnidas organismos cumplessos, difìtziles e delicados, est pretzisu a torrare a resonare in manera istratègica, unende bisos e cuncretesa. Pròpiu comente aiat fatu Bacaredda etotu”.
At naradu s’Assessora a sa Cultura Maria Dolores Picciau: “Sa punna nostra est sa de rinnovare sa memòria de custu intelletuale de cabbale, torrare a iscobèrrere sa personalidade sua e cussos fatos polìticos, sotziales e culturales chi aiant animadu Casteddu tra Otighentos e Noighentos, cun s’afirmadura de sa burghesia locale e sa bisione sua de isvilupu, cun sa trasformatzione de sa tzitade fortificada e su mudamentu cara a su mare, ma fintzas ammentare sas cunditziones sotzioeconòmicas difìtziles de su pòpulu chi in sos abbolotos sambenosos de su 1906 aiant pagadu cun su sàmbene”.
Atividade realizada cun su contributu de sa Regione Sardigna – Imprentas 2021-2022. Lr 22/2018, art. 22
Attività realizzata col contributo della Regione Sardegna – IMPRENTAS 2021-2022. LR 22/2018, art. 22
