Cunforma a s’obietivu de s’80% de diferentziada programmadu pro su 2029 (tzifra cunfirmada s’annu coladu cun s’agiornamentu de su Pianu regionale), sa Sardigna diat pàrrere protzedende bene in contu de gestione de refudos.
Su resurtadu de su 2023 est prus chi non bonu sende chi s’ìsula intrea nch’est giai lòmpida a su 76,46% (datos de sa Regione, 76,3% narat s’Ispra): su mègius de s’istadu petzi a pustis de su Vènetu (77,7%, semper datos Ispra) e de s’Emìlia-Romagna (77,1%).
Su datu sardu sighit custas crèschidas: +0,4% cunforma a su 2022; +1,4% cunforma a su 2021; +1,8% cunforma a su 2020; +3% cunforma a su 2019. As’80% de su 2029 bi mancat ducas petzi su 3,7% in ses annos (diat bastare unu +0,62% annu cun annu)
Custu su datu de sas provìntzias cun sa de Aristanis chi nche bàrigat giai dae como s’80% (81,3); su mègius datu provintziale de Itàlia est su de Trevisu cun s’89,1%. Prus in bassu, e manu-manu calende, b’amus sa de Nùgoro (79,6), sa de su Sud Sardigna (79,4) e, in finitias, sa de Tàtari (71,1).
Bonu su datu de sa tzitade metropolitana de Casteddu chi, cun su 78,2% suo est sa prima in totu Italia (in ue sa mèdia chi pertocat custos entes locales territoriales est de su 59,4%): sa segunda, chi est sa Bologna chi nos contant prus chi no efitziente, si firmat a unu 73,5% (su cabu de logu nostru nche li binchet belle 5 puntos pertzentuales).
Custos sos datos in contu de Comunes: intre sos chi nche bàrigant sos 30mìgia abitantes e chi nche colant s’80% devimus mentovare a Nùgoro (83,47%) e a Aristanis (80,91%); male Tàtari chi, pro neghe de ritardos atuende su servìtziu de regorta diferentziada, si firmat petzi a su 60,96%.
De sos Comunes mesanos e minores tocat a iscrìere de Carloforte (89,46%), de Lu Palau (88,31%), de Gonnostramatza (85,04%), e de Biddeputzi (88,03%), esempros virtudosos de sustenibilidade e e de otimizatzione de sos servìtzios.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
