Custu lunis, in Lanusè, at abertu de sa primu àndala atzessìbile a totus de sa Sardigna. Su nùmene, seberadu paris cun s’Ufìtziu de sa Limba Sarda, est Àndala Segura. Si tratat unu percursu a aneddu de 1,6 chilòmetros in intro de su pranu a pees de Monte Seleni, a unos 1.000 metros de artia.
Progetada e cuncordada dae su Comunu de Lanusè paris cun s’Agèntzia Forestas, gràtzias a sos fundos PSR (GAL Ogiastra) e POR FESR (Regione Autònoma de sa Sardigna, Assessoradu Ambiente, Forestas) pro s’ora est s’ùnica sèmida tzertificada e assentada in su catastu regionale de sas àndalas (RES) cun su còdighe C-104A.
Su caminu, pro èssere reconnotu comente àndala cun sa tripla atzessibilidade (dotadu de suportos pro sas disabilidades fìsicu-motòrias, sensoriales e psìchicas-cognitivas) at dèpidu rispetare totu sos critèrios de su regulamentu regionale. Est un’àndala pro totus, sende chi est istada progetada sighende sos printzìpios de su “design for all” (progetadu pro totus) chi donat atentu a sa diversidade umana, a s’inclusione sotziale e a s’agualidade. Difatis, sighit custos critèrios fundamentales:
• parchègios e bagnos atzessìbiles;
• percursu naturale apamentadu e traballadu pro garantire su gosamentu autònomu e assistidu cun sa carrosedda;
• percursu acostigiadu a su 90% cun palos e passamanos, palos pista-bàculu pro su gosamentu autònomu de sos tzurpos e ipovedentes
• percursu frunidu de iscritas braille, cartellos cun sos rastros e iconas-pitogrammas a pòddigu in rilievu, màrchiu NFC pro sa leghidura assistida cun aparatos portàtiles (telefoneddos intelligentes) tràmite aplicativu a s’indonu (fintzas pro Android e iOS)
• descritziones, signalètica e libru-itineràriu ispirados a sos cànones de sa comunicatzione aumentativa vicànica (CAA) pro su sustennu de sas persones cun istorbos de s’isfera autìstica (contivigiadu dae s’assòtziu Ogliastra Informa).
In prus at a èssere posta a disponimentu una carrosedda elètrica adata pro su terrenu malu.
Su nùmene Àndala Segura, seberadu dae su Comunu paris cun s’Ufìtziu de sa Limba Sarda de Lanusè, cheret donare s’idea de unu logu seguru, selenu e pàghidu, chi totus podent rugrare.
Su tratzadu est in intro de su padente de èlighe de su Seleni, a pagu tretu de sitos archeològicu importantes, comente su Nuraghe Gennacili e sas duas tumbas de gigantes, ma fintzas a pagu tretu de àreas atrezadas de grandu interessu naturalìsticu e pro fàghere craru, comente “Sa Furca ‘e sa Pruna”, avaloradu galu de prus gràtzias a s’òpera de arte ambientale “La poesia guarda lontano” de s’artista Stefania Lai.
S’interventu, costadu belle € 80.000, est istadu gestidu dae s’àrea de sos Afares Generales de su Comunu de Lanusè chi at coordinadu sas fainas cun sos sighentes partners printzipales de progetu:
– Progetu e diretzione traballos: Dot. Agr. Donatello Sioni
– Esecutziones traballos: Dita Mario Piroddi Edilizia Artigiana
– Cartellonìstica e signalètica: Full Media Service, Forestas
– Realizatzione di un roadbook in CAA (Comunicatzione Aumentativa Alternativa) ipetzìficu pro disabilidades cognitivas contivigiadu dae Ogliastra Informa
– Òpera de arte: Stefania Lai
– Nùmene: Ufìtziu Limba Sarda de Lanusè
– Arredos in atzàrgiu e linna: Gian Leonardo Viglino
– Suportu tècnicu e frunidura materiales: Forestas-Servìtziu territoriale de Lanusè, Sportello del Sentiero, Tavolo Tecnico Regionale RES.
S’eventu de s’inauguratzione fiat istadu insertadu in su cartellone de s’editzione natzionale 2024 de su Fèstival de s’Isvilupu Sustenìbile.
Fotos: Giorgio Altieri
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
