In Orgòsolo b’at unu bighinadu, unu trighìngiu, chi como tenet pintada una parte sua cun sos colores de sa bandera de sa Palestina. In pratza de Antoni Gramsci, in su “trihinzu ‘e su Postu”, cussa bandera est “istèrrida” in sas iscaleras artziende·bi.
Est acontèssidu chi unas deghe fèminas orgolesas ant disinnadu de manifestare de custa manera sa solidariedade issoro a su pòpulu de Gaza, massacradu e giagaradu dae sas domos nadias oramai derrutas.
Sessanta mìgia sos mortos a como (tzertificados dae s’ùrtimu raportu de s’ufìtziu de sas Natziones unidas pro su coordinamentu de sos Afàrios umanitàrios). Dòighi sos chilos de tinta comporados pro custa faina artìstica: tres pro cada colore de sa bandera pintada: su ruju de su triàngulu e su nieddu, su biancu e su birde de sas bandas.
S’idea est nàschida a sa muralista de su logu Lina Sanna: «Deo isto in cussos tretos, e cada borta chi bidia cussas iscaleras pensaia a comente las podìamus tìnghere pro nch’istare in s’oru de cussa gente. S’idea de bi pintare sa bandera issoro bi l’apo dae ghennàrgiu, ma amus semper rimandadu pro more de totu s’abba chi at fatu. Amus dadu a ischire de s’intentu nostru a su Comune pro mèdiu de una pec e como amus fatu su de fàghere».
De custa manera, a concruos de sa chida colada, Lina e cumpàngias ant fatu traballare su pinzellu e su coro. Cun issas finamentas tzia Pepanna Sio, dae pagu colados sos otanta beranos, cun sos ogros suos chi ant connotu totu canta s’istòria de su muralismu orgolesu comintzadu chimbanta annos a como gràtzias a Francesco del Casino.
«Non pensaìamus de àere fatu una cosa a tretu de girare peri su web comente est sutzessu», narat Lina. Ma custu est su singiale de cantu sa càusa palestinesa nche siat in su coro de su bonu de is sardos. «Due popoli una strage», b’at iscritu in un’àteru murale de sa bidda. S’ispera est chi totu si potzat tramudare in “Due popoli una terra“. Duncas sena pòpulos eletos; sena terras furadas.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
