“A s’Orgolesa” de Davide Melis at conchistadu su pùblicu de sa de noe editziones de IsReal, su fèstival de su tzìnema documentàriu promòvidu e organizadu dae s’Istitutu superiore regionale etnogràficu. Premiada pròpiu dae is presentes in sala, sa pellìcula at otènnidu su pannu in sa categoria “Scenari sardi”.
Custa produtzione tzinematogràfica de Karel naschet gràtzias a sa collaboratzione cun su Tenore Supramonte. E est pròpiu su càntigu a sa moda orgolesa (cun sa “vohe” nòdida de Francolino Davoli) chi acumpàngiat sas iscenas de su film intreu. Unu film in ue non b’at una boghe narradora (ca sunt is protagonistas sos chi faeddant) e in ue sa limba est petzi sa de su logu (francu in sa liturgia) sena sutatìtulu perunu.
Su documentàriu comintzat e finit presentende·nos sa dinàmica comunitària de sas festas chi marcant su calendàriu de sa bidda, cun sas professones, sos bestires e fintzas sos momentos prus làicos. Un’annu de osservatzione, de complitzidade e de ripresas.
In intro de custu annu finas sos concruos solares suos, cun duos apuntamentos fissos de su 31 de nadale: is pitzinnos chi andant peri sas domos pedende su “hohone ‘e handelaria” e sos càntigos de sos prus mannos peri sas domos de is cojuados noos.
Chistione de bundu bident sa lughe essende dae sas bucas de is orgolesos “istoriande” in intro de sa telecàmera: sa vida in sos cuiles e in sos paschìngios comunales; su rispetu pari–pari a tales chi de cussa natura cada unu si nde potzat gosare; s’isvilupu de s’arte de is muralistas in sas fatzadas de sas carreras; su martìriu de Antònia Mesina. E àteros contos e istòrias.
«Custu reconnoschimentu – narant dae s’Isre – marcat s’impignu de su fèstival ponende in parte is ispetadores in su sèberu de sas òperas sas prus de vàllia, chi nde suspint sa cumplessidade sotziale e culturale de s’ìsula».
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
