Triunfu internatzionali mannu po s’artista sonora casteddaja Maria Cristina Marras. S’òpera sua audio, cun su tìtulu “Spaciada sa Bregungia”, at conchistadu su prèmiu Golden Prize a s’HearSay International Audio Festival 2026.
S’eventu, in Kilfinane in Irlanda, est cunsideradu unu de is prus de importu festival europeus e globalis dedicaus a s’audio d’autore, a su documentarismu sonoru e a s’arte sonora.
“Spaciada sa Bregungia” est un’òpera de impatu emotivu e tzivili profundu, totu in lìngua sarda. “Si tratat de una sèberu espressivu radicali e cussentziosu, acapiau a una voluntadi firma de torrai a s’identidadi – ant iscritu in una nota de imprenta -: su sardu, difatis, est una lingua chi s’autora no at podiu imparai liberamenti cando fia pipia, po mori de is protzessus de assimilatzioni culturali chi ant storicamenti penalizau is minoràntzias linguìsticas in su territòriu natzionali”.
A traessu de una narratzioni chi ponit impari cun sabiesa sa dimensioni personali e cussa polìtica, su petzu afrontat sa cantzellatzioni linguìstica e culturali de sa Sardigna. Su flussu sonoru evocat is ferridas stòricas de s’ìsula, tocchendi temas de denùntzia: de is esercitatzionis militaris in su territòriu (“su militari”), a sa percetzioni de sa pròpia terra comenti una “colònia” giai de is lìbrus scòlasticus de stòria, fintzas a sa mirada stereotipada e acundiscendenti de su “continente” (tzitendi s’òpera de D.H. Lawrence).
S’òpera s’interrogat asuba de su trauma colletivu de sa trasmissioni generatzionali de sa lìngua, chi non b’est istada, trasformendi su sensu de curpa e s’analfabetismu in sa pròpia lìngua de orìgini in un fueddus de liberatzioni. “Sa tessidura sonora arrogat su mudimini de sa sutamissioni cun una decraratzioni de identidadi, chi si traduit in su auspìtziu potenti e liberatòriu chi dat su tìtulu a su traballu: sa fini de sa bregùngia stòricamenti imposta po is pròprias orìginis e po sa pròpia fueddada”.
Cun custu reconnoschimentu internatzionali autorevoli, sa stòria, is ferridas e s’identidadi de sa Sardigna artzant a unu palcoscèniu globali, dimustrendi sa potèntzia straordinària de s’audio-documentàriu comenti strumentu de resistèntzia, denùntzia e cunservatzioni de sa memòria stòrica.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
