Istòrias de res e de printzipessas, incantèsimos de truncare, iscientziados istravanados e tzircos de àteros tempos. Dae mèrcuris su 10 a domìniga su 14 de làmpadas, sos ispàtzios de Sa Manifattura de Casteddu s’ant a mudare in unu palcoscènicu a chelu abertu gràtzias a sa de bintibator editziones de ‘Il grande teatro dei piccoli’.
Su fèstival, organizadu dae sa cumpangia istòrica ‘Is Mascareddas’ (Prèmiu Ubu 2023) cun sa diretzione artìstica de Donatella Pau e in collaboratzione cun Sardegna Ricerche, promitet chimbe dies de immersione totale in su teatru de figura dedicadas a sas famìlias e a su pùblicu prus giòvanu.
Sa punna est sa de tzelebrare sa capatzidade de su teatru de fraigare mundos interiores pro mèdiu de s’imaginatzione. Cada die comintzat a sas 4 de merie cun laboratòrios creativos pensados pro dare impèllida a sa manualidade e a su pensamentu crìticu de sos pitzinnos: sas atividades bàntzigant intre sas umbras tzinesas e s’aprontu de pupunes cun impastos de pabiru, colla e abba, finas a sa body percussion e a sos contigheddos in limba sarda. Dae sas 6 a sas 7.30, imbetzes, sas propostas pertocant sas mègius produtziones natzionales e internatzionales.
Su cartellone oferit unu viàgiu intre traditzione e innovatzione. Sas primas dies, sa ‘Cumpangia Barbariccia’ e sos de ‘I burattini de Mattia’ ant a propònnere ispetàculos clàssicos in baraca, torrende a interpretare sa ‘Commedia dell’Arte’ e sas aventuras de Fagiolino. Chenàbura 12 est sa borta de ‘Zanubrio Marionettes’, chi at a trasformare ogetos fitianos in sos lupos de sas fàvolas prus nòdidas, cun in fatu sas aventuras còmicas de ‘L’Aprisogni’.
Su fine de chida s’aberit sàbadu cun su pop-up gigante de ‘Il gatto con gli stivali’ de Tieffeu. Sa serrada domìniga cun sa poesia clownesca de ‘Gurdulù Teatro’ e su tzircu de linna de sa cumpangia praghesa ‘Karromato’. Intre giogos de linna e merende cun produtos locales, su fèstival si cunfirmat unu ispàtziu de comunidade de grandu agiudu pro sas famìlias.
