Pagu meda mancat a sa torrada eletorale de su 25 de cabudanni. E pagas sunt sas dudas in contu de vitòria. S’ùrtimu sondàgiu at a èssere su de chenàbura, ma giai dae tempus b’at sentidu unànime in favore de unu tzentru dereta chi nche bàrigat de meda su 40% de sos intervistados.
S’efetu Giorgia Meloni est prus chi non craru, cun su partidu de dereta prontu a regòllere su discuntentu cajonadu dae sos guvernos chi ant caraterizadu custa legisladura: semper a s’opositzione, mescamente cun Mario Draghi a caddu, sos “patriotas” de Fratelli d’Italia nche sunt a su presente a su 25% o barda faghende·nos a cumprèndere chie est chi at sètzere sa cadrea de Presidente de su Cussìgiu. Lega e Forza Italia non lughent e pagant s’apògiu issoro a unu guvernu de grandu coalitzione, mancari sa furriada issoro de trìulas. Ma sos partidos de Salvini e de Berlusconi ant a garantire su matessi una pertzentuale de votos chi serbit a s’alleàntzia pro àere una majoria bene bardiada.
Su tzentru manca non nche diat dèvere lòmpere nemmancu a su 30% cun su Pd ponende·nche a banda s’ipòtesi mìnima de èssere, a su nessi, su primu partidu. Cunforma a sos ùrtimos sondàgios su de Letta marcat una mèngua noa falende·nche a pagu prus de su 21%. Cale est s’istrategia de su Pd finamentas cunforma a sas ùrtimas decraratziones de su segretàriu suo? Sa chistione geopolìtica e sa de una furriada autoritària possìbile.
Pro su chi pertocat sa prima Letta faeddat de dereta in fatu de Putin e de Orban contra a sa Nato, ma sa tesi cheret medida ca sos atores internatzionales reatzionàrios nche los agatamus finamentas in intro de s’alleàntzia atlàntica (pensemus a sa Polònia de su Pis) e ca Meloni at espressadu prus e prus bias su campu internatzionale suo sena s’opònnere a Draghi in custu. Pro sa segunda chistione sa cramada in defensa de sa democratzia non ponet oriolu a sos eletores indetzisos, afòrtiat su “zoccolo duro” caentende·si cun sa frama tricolore e inchìberat sa campagna eletorale de Calenda e Conte, chi ant a nàrrere chi su votu ùtile est, de pare a pare, su pro Azione o Chimbe isteddos.
B’at balu carchi die de campagna eletorale ma mai che a sa de ocannu amus bidu sos giogos serrados in antis de s’ora. Sos giogos eletorales, ca su restu est totu un’icògnita, e custu l’ischit finamentas Meloni a probe de guvernare una crisi prus chi no inèdita.
Atividade realizada cun su contributu de sa Regione Sardigna – Imprentas 2021-2022. Lr 22/2018, art. 22
Attività realizzata col contributo della Regione Sardegna – IMPRENTAS 2021-2022. LR 22/2018, art. 22
