S’Ogiastra s’ammàniat a retzire sos biagiadores de su fèstival de su turismu responsàbile IT.A.CÀ, in programa dae su 13 a su 21 de cabudanni 2025. No una rassigna de eventos ebbia, ma unu beru mescuritzu de esperièntzias: binnennas e laboratòrios de coghina traditzionale, pedaladas intre sartos e montigros, essidas intre paisàgios agrestes, addòbios culturales e dibatas. Cada addòbiu devenit una crae pro interpretare su territòriu cun ogros diferentes: dae sas Domus de Janas a sas grutas de Tacu Isara, finas a sos nuraghes chi torrant a contare s’istòria millenària issoro.
Comente ispiegat in un’intervista a TCS Jean Luc Madigner, coordinadore de su Festival IT.A.CÀ – Migranti e Viaggiatori, “At a èssere un’ocasione pro iscobèrrere biddas noas comente Talana, pro contare sa tziviltade nuràgica in Biddamanna Strisàili, in Gàiru pro connòschere sas grutas suas, in Baunei pro chistionare de sa Blue Zone, e ancora in Lanusè e Jersu pro allegare de sas richesas locales issoro”,
Su tema natzionale 2025, “Costoire su benidore ”, in Ogiastra agatat espressione in s’idea de unu turismu “pàsidu e priu”, chi allegat de longevidade, chi iscurtat sa boghe de sas comunidades resilientes e a su patrimòniu archeològicu e paesagìsticu. Unu fèstival chi aunit raighinas antigas e disafios cuntemporàneos, trasformende·si in unu laboratòriu de turismu èticu e cusciente. Ca biagiare no est a arribbare ebbia, ma fintzas abarrare.
“Custa editzione – sutalìniant sos organizadores – cheret animare unu turismu sustenìbile, chi iscat contare su mare paris cun su monte, chi avaloret sas comunidades de su logu e chi agiudet a allonghiare s’istajone turìstica peri a pustis s’istade”.
Pro una chida intrea, IT.A.CÀ at a colare in is biddas de Talana, Gelisuli, Biddamanna Strisàili, Tortolì, Lanusè, Baunei, Jersu e Gàiru, trasformende s’Ogiastra in unu laboratòriu a s’abertu. Si cumentzat sàbadu su 13 de cabudanni in Tortolì, cun sa cunferèntzia de aberidura sighida dae una pedalada ecològica intre Gelisuli e Biddamanna. In sas dies signentes s’ant a alternare escursiones intre bìngias e padentes, passigiadas sensoriales cun degustatziones in cantina, laboratòrios de culurgiones in famìlia, dies intregadas a sa longevidade in Baunei, esploratziones suterràneas in Gàiru, esperièntzias in canoa in Biddamanna e bìsitas in sos giassos nuràgicos de S’Arcu ’e is Forros e sa Carcaredda.
No ant a mancare momentos de cunfrontu e riflessione: dae sa cunferèntzia intregada a su Treninu Birde e sa a mobilidade durche, a sa mesa de cunfrontu pro allegare de turismu culturale internatzionale, finas a s’addòbiu de Tortolì dedicadu a fèminas e a s’imprenditoria sustenìbile.
Domìnigu su 21 de cabudanni si serrat in Talana, cun unu percursu intre natura e archeologia dedicadu a sa tziviltade prenuràgica e nuràgica. At a sighire sa dibata “Su benidore de su turismu responsàbile in Ogiastra”, ocasione de cunfrontu e bisione cumpartzida.
Su programma cumpletu de IT.A.CÀ l’agatades inoghe.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
