S’intìtulat “Se una volta ho sbagliato – Storie della Collina”, su Podcast formadu dae 12 puntadas e dae ateretantas intervistas a persones chi ant bìvidu, pro sèberu o pro netzessidade, in sa Comunidade fundada prus de 25 annos a oe in Serdiana dae Don Ettore Cannavera.
Sos protagonistas de sas 12 intervistas, educadores, voluntàrios e òmines chi ant isballiadu e iscontant o ant iscontadu una pena, allegant de issos matessi sena timère de mentovare is errores chi ant fatu, antis a s’ispissu movende dae cussos, cuscientes de s’importu chi tentet a cumpartire sas esperièntzias de vida contendelas.
Dae s’esperièntzia ‘acoliosa’ de sa Comunidade nde istupant a campu istòrias cummoventes e drammàticas, retratos umanos de ogna genia. Nde essit a pìgiu su machiore e su paradossu de su sistema cartzeràriu atuale, galu prus drammàticu cando tocat sos minores: unu logu definidu “muntonàrgiu sotziale” e “generadore de delincuèntzia”, chi non frunit trastos de crèschida personale e sotziale, comente dimustradu dae sa pertzentuale arta meda (70%) de sos pitzocos chi, una bia iscontada sa pena in presone, torrant a delìncuere.
Su podcast naschet pro torrare a afirmare s’importu mannu chi tenent sos percursos educativos e de reinserimentu alternativos a sa “galera”, chi sunt fintzas garantidos de sa Costitutzione italiana.
Su traballu est istadu contivigiadu dae sa giornalista e autora Giulia Clarkson cun su s’agiudu de sa polistrumentista Ylenia Lampis e cuncordadu in collaboratzione cun Sergio Benoni de Radio X.
Sas istòrias, prus a mancu 14-18 minutos ognuna, ant a èssere publicadas ogni martis pro 12 chidas in su giassu de sa Comunidade La Collina, in su giassu radiox.it, in sas prataformas Spotify, Apple podcast e Google podcast, e trasmìtidas a ora de sas 9 e in rèplica a sas 14 in sas frecuèntzias 96.8 in Fm e in direta streaming in Ràdiu X. Sa prima puntada est, giai andada in unda martis coladu.
Atividade realizada cun su contributu de sa Regione Sardigna – Imprentas 2021-2022. Lr 22/2018, art. 22
Attività realizzata col contributo della Regione Sardegna – IMPRENTAS 2021-2022. LR 22/2018, art. 22
