Domìnigu coladu, sa Sardigna at fatu un’àteru passu a in antis cara a sa valorizatzione de su patrimòniu naturalìsticu e archeològicu suo gràtzias a s’inauguratzione de un’àndala escursionìstica noa tra Biddanoa Strisàili e Bau Mela. S’initziativa at bidu sa partetzipatzione de 90 sòtzios de su Cai (Club Alpino Italiano) bènnidos dae diversas cussòrgias de s’ìsula, aunidos in sa punna de connòschere e promòvere su territòriu ogiastrinu.
Ghiadu dae sos dirigentes de su CAI, su percursu, chi colat intre panoramas incantadores e àreas de interessu archeològicu, est destinadu a èssere insertadu in sos registros de sas àndalas a livellu regionale (Res) e natzionale (Rei). Su percursu movet dae pratza sa San Michele de Biddanoa, fratzione de Biddamanna Strisàili, e rugrat unos cantos de sos logos prus significativos de su logu, tochende su ponte Sannorthi, Bau Aradulu, sos padentes de Genna Ardeleti, Tziu Bennero, S’Ena, in prus sos nuraghes de S’Enna ‘e sa Pira e Mesu Serra. De prus, includet su situ archeològicu de Sa Carcaredda e s’òasi “Regina Apostolorum” de Bau Mela.
Unu percursu ammajadore meda chi acumpàngiat sos escursionistas in mesu a padentes crosos de èlighes e chercos seculares, oferende panoramas ùnicos dae sos craros de Sa Menta e Sa Nuxe, e testimonias antigas de sa presèntzia umana.
Su progetu, chi at a èssere presentadu in dies sighentes dae s’amministratzione comunale de Biddamanna, rapresentat unu traguardu de importu pro sa promotzione sustenìbile de su territòriu, aberende oportunidades noas pro sos amantiosos de escursionismu e de istòria. S’àndala noa de su Cai cumbinat s’aspetu escursionìsticu a su culturale, e at a devènnere unu puntu de riferimentu pro totu sos chi disìgiant iscobèrrere sas bellesas naturales e archeològicas de s’Ogiastra.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
