S’isport e sa formatzione donant s’oportunidade de unu riscatu sotziale e s’isperu de unu traballu benidore a trinta detenudos de su càrtzere de Tàtari, Nùgoro e Casteddu. A pustis de sete meses de letziones de teoria e de pràtica est acabadu su progetu “Lìberos in s’Isport”, organizadu dae su Csen Sardigna paris cun sa Regione Sardigna e sos Istitutos penitentziàrios de s’ìsula.
A sos detenudos chi ant sighidu sas letziones sunt istados cunsignados is diplomas de Istrutore de body building e fitness, paris a sos abilitamentos a su primu sucursu cun s’impreu de unu defibrilladore semiautomàticu.
A cunsignare sos diplomas sunt istados sos presidentes natzionale e regionale de su Csen, Francesco Proietti e Francesco Corgiolu. Pro favorire su protzessu de insegnamentu e aprendimentu sos organizadores ant seberadu de impreare metodologias didàticas ativas, chi cumprendent letziones frontales, discussiones, dimustratziones, esercitatziones e tirotzìniu. Sos trinta detentos ant sighidu 56 oras de letziones in bator mòdulos formativos, prus 4 oras de esàmene finale, e ant achiridu sa capatzidade de progetare unu programma de allenamentu cumpletu.
Sos resurtados de su cursu de formatzione ant a èssere documentados in unu filmadu realizadu dae Directa Sport. Su Csen Sardigna, in prus de su cursu, at donadu su materiale tècnicu pro pòdere cuncordare una palestra pro totu sos detenudos. Cun s’acabbo de sos cursos sos trinta diplomados tenent in sa manu unu tìtulu professionale reconnotu, chi at a permìtere issos de torrare a cara de su mundu de su traballu gràtzias a s’isport. Cun su diploma Natzionale de Istrutore de body building e fitness ant a pòdere traballare in totu sas istruturas isportivas, in nue est prevìdida sa figura de su tècnicu isportivu. Gràtzias a su tziclu de letziones sighidas, sos dischentes ant tentu manera de fissare un’abitùdine isportiva sana in sa cuotidianidade cartzerària, paris a sa possibilidade de achirire una cultura isportiva fundada in sos balores de sa continuidade, de sa pràtica e de s’agregatzione.
