Biddamanna Strisàili oe s’est firmada. Su sìndigu Alessio Seoni at proclamadu su lutu tzitadinu in regordu de Thamer Shehabeld, Ahmed Sharweda e Mohamed Rizk, is tres giòvanos operajos egitzianos mortos in s’intzidente malu de su 30 de onniasantu in sa Provintziale 27.
Sa die cointzidet cun sa partèntzia de is salmas dae s’Ogiastra cara a s’Egitu e cun su de bintunu anniversàrios de s’alluvione de su 2004, una de is fertas prus profundas de s’istòria reghente de sa bidda.
Su dramma est acontèssidu in su caminu pro calare a Tortolie, a duos chilòmetros dae Biddamanna: sa vetura de is tres operajos at fatu unu brìnchidu de deghe metros e nch’est ruta farrancas a susu in su tràinu a suta de su ponte de Sothai. Is tres pitzocos sunt mortos deretu. Sa Procura de Lanusè at dispostu su secuestru de su guard-rail, mentras is carabineris sunt sighende is atzertamentos pro cumprèndere si s’infrastrutura apat tzèdidu o si ddoe tèngiat àteras càusas.
A ogna contu, su tretu de sa SP27 est connota pro is medas intzidentes e sa tragèdia at torradu a pesare sa chistione de sa seguridade istradale in is àreas internas.
Non pro nudda su sìndigu Seoni, eletu in cabudanni presidente de sa Provìntzia Ogiastra, dae sa primu die at denuntziadu sa situatzione de is caminos ogistrinos e s’est chesciadu contra sa Provìntzia de Nùgoro chi diat dèpere trasferire 23 milliones de èuros, de custos 9 milliones destinados a s’ssèilu de su ponte de s’intzidente. «Sena custu dinari non podimus fàghere cumentzare is traballos», at torradu a nàrrere in is dies coladas, sutaliniende s’apretu de interventos chi non podent prus èssere transidos.
Oe, s’amministratzione de Biddamanna at invitadu is tzitadinos e cummertziantes a respetare cun su mudìmene su dolore de is famìlias de is vìtimas, chi traballaiant in Ogiastra a contu de una dita de Pavia impinnada in sa posta in seguresa de is rios e trainos dannificados pròpiu dae s’alluvione de su 2024.
