Est acabbadu sas dies coladas, in intro de su progetu “Coru, Sentidu e Ammentu” aprontadu dae sa ASL de su Campidanu mesanu, unu laboratòriu isperimentale de istimulatzione cognitiva movende dae su giogu de sos iscacos, chi giogu ebbia no est.
Ainas pro tènnere ischida sa conca, a sos pedones, a sos alfieris, a sos caddos, a sas turres, a su re e a sa reina los impreant finamentas pro sa riabilitatzione de sas persones. Est pro custu chi nd’ant fatu impreu bonu in su servìtziu de Neurologia in sos meses de santugaine, de santandria e de nadale gràtzias a s’impinnu de sa neuropsicòloga Maria Lucia Cogoni.
Un’impreu galu prus profetosu pro more de su còdighe linguìsticu isseberadu: su sardu. Sa faina, in intro de unu cuntestu de implementatzione de su Pri (Progetu riabilitativu individuale) est sighida duncas cun s’agiudu de s’operadore pro sas atividades culturales de su progeto, Gianni Farci, e de s’operadora de s’isportellu linguìsticu Manuela Ennas, istrutora de sa Federatzione italiana de iscacos.
De prus, a custu laboratòriu b’ant pigadu parte finas sos familiares e sos amigos de sos utentes cun sessiones de giogu abertas.
Comente b’est intradu su sardu? Pro fatzilitare su percursu, e pro mustrare s’importàntzia de s’impreu de sa limba materna in custu protzessu cognitivu, in intro de su laboratòriu matessi ant imprentadu unu libreddu bilìngue cun sas règulas de su giogu.
«Sa limba – narant sos promotores de sa faina – est s’istrumentu printzipale pro espressare e organizare sos pensos, s’impreu giustu suo est de giudu pro acrèschere sas capatzidades cognitivas. Duncas su giogu de sos iscacos praticadu cun sa limba materna pròpia podet agiudare a megiorare sa cumprensione, sa comunicatzione e sa capatzidade de arresonu ispuntzonende unu pensu lògicu e istruturadu».
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
