S’Europa sud-otzidentale est colende una de sas chidas prus crìticas de s’istòria sua reghente. Pro sa penìsula ibèrica non b’at pasu: a pustis de su passàgiu de sas tempestas Kristin e Lenardu, chi aiant giai bisestradu sos terrinos e unfradu sos cursos acuàticos, como est sa borta de Marta, traschia destruidora cun bentos de uraganu e ghetadas de abba cun intensidade grae.
Sa situatzione est prus chi non dìliga in Andalusia. In provìntzia de Càditze, sa localidade de Grazalema at marcadu unu datu chi ponet a tìmere: prus de 800 millìmetros de abba pròida in mancu de deghe dies, una tzifra chi nche bàrigat sa mèdia annuale de sa regione intrea. Cun cunsighèntzias chi chie si siat pdet bìdere in totue: istradas torradas a rios de ludu; prus de 150 artèrias printzipales serradas a su tràficu; collegamentos ferroviàrios suspesos intre sa capitale e su chirru sud de su Paisu.
In Màlaga, sas iscuadras de sucursu sunt sighende a pilisare sos letos de sos rios in chirca de una pitzoca chi no l’agatant prus. In su mentres su bilantzu provisòriu de sas vìtimas contat – iscriende custu petzu – giai duas vìtimas.
Male in su restu de s’Ibèria: in territòriu portughesu s’artis-arts est màssimu (tocat a cumprèndere si fintzas in cue b’at chie si nde riet che a carchi leone social de custos tretos). Su riu Tejo si nch’est essidu dae sa sede sua in paritzos puntos de su distretu de Santarém, imponende a sa Protetzione tzivile evacuatziones urgentes de nùcleos familiares intreos.
Ma s’arrennegu de sos elementos no est petzi dende corfos a sas infrastruturas; fintzas sa vida democràtica de su Paisu est interessada. Pro more de s’impossibilidade de garantire sa seguresa de sos tzitadinos in sos sègios (o a cue andende), sas autoridades lusitanas ant disinnadu de apostivigare sas eletziones presidentziales de s’8 de freàrgiu in nessi tres comunes portughesos.
Sa cajone de custu trenu de tempestas in sa penìsula ibèrica est in sa presèntzia de unu riu atmosfèricu càrrigu de umididade tropicale. Sos espertos de Aemet in Ispagna (Agencia estatal de meteorología) e de Ipma in Portugallu (Instituto português do mar e da atmosfera) sunt dende s’avisu: s’emergèntzia no est finida. Cun sos terrinos chi non sunt – pro como – prus a tretu de suspire unu gùtziu in prus de abba, cada ghetada noa si podet mudare in catàstrofe.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
