Su mundu de s’aviatzione est unu setore ghiadu dae sos òmines. Epuru, fèminas comente Silvia Baldussu, dipendente de Poste Italiane, dimustrant chi impìnniu e determinatzione podent barigare sas làcanas postas dae sa sotzietade nostra.
Nàschida in Roma dae babbu de Partiolla e mama de Carbònia in su 1977, Silvia est devènnida Primu Ufitziale de Boeing 737 pro Poste Air Cargo a pustis de annos de istùdiu e crèschida professionale. Poste Air Cargo S.p.a est sa sotziedade de su Grupu Poste Italiane chi s’òcupat de sas operatziones de recàpitu de posta e pachetes.
Sa presèntzia de sas fèminas in s’aviatzione italiana est galu bàscia si est beru chi isceti su 3,6% de sos pilotas est fèmina. “Meda s’est traballadu pro sa paridade de gènere, e su traballu fatu dae Poste Italiane est un’esèmpiu cuncretu, però su caminu de fàghere est galu longu – contat Silvia -. Oe chi so mama de duos fìgios cumprendu ancora de prus cantu siat de importu su sustennu de sa famìlia pro cuntziliare vida privada e professionale”.
In su 2007 Baldussu at coladu sas seletziones in su tzentru addestramentu de sa cumpangia e dae tando sa carriera sua est andada in crèschida. “So nàschida in una famìlia ue nèmus at mai pensadu chi una fèmina non poderet fàghere su chi faghet un’òmine”, agiunghet.
In fines faeddat de sa Sardigna: “M’intendo sarda. In s’Ìsula tèngio totu sa famìlia mea de orìgine. Bìdere sa bellesa sua dae su chelu mi ispantat. Cando tèngio carchi die lìbera, ando a Partiolla in sa domo de sos ajajos paternos”.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
