“It’s been seven hours and fifteen days…” . Sas notas malincònicas de Prince, filtradas dae sa boghe de Sinéad O’Connor, sonant in s’aposentu de su Doral Resort de Miami comente unu lamentu pro un’òrdine mundiale chi non b’est prus. Si pro su Board of Peace sa colunna sonora fiat s’energia istrambòtiga de “Gloria”, inoghe su clima est prus mìsticu e claustrofòbicu. Su Shield of the Americas no est petzi unu summit; est una setziada ispìritica geopolìtica suta su sole de sa Flòrida.
Su Donald natzionale si presentat a s’addòbiu a pustis de deghinas de manos evangèlicas chi l’ant inghiriadu, tochende·lu cun unu framore chi pariat bantzighende·si intre un’esortzismu e una cària ayurvèdica. In totue l’ant tocadu – coddos, palas, ischina, forsis finas in pilos – che chi esserent chirchende·li su sacru crisma o, in forma prus prosàica, che chi esserent iscumproende sa cunsistèntzia de unu cantzu de petza in sa panga de su masellaju. Issu, su seberadu dae Deus, est pedende amparu, un’iscudu.
Ma duncas, ite est custu Iscudu de sas Amèricas? In teoria est unu capolavoru de Marco Rubio: un’alleàntzia emisfèrica pro fàghere de su continente una gated community. S’obietivu, difatis, est su de si blindare contra a sas influèntzias tzinesas e russas, pròpiu como chi Teheran est brujende suta sos raid americanos. Si faeddat de una rete de difesa missilìstica integrada, de dàtzios a tretu de fàghere prànghere a un’economista e di una gestione “cumpartzida” de sas risorsas energèticas (o siat: est a fàghere su chi narat Washington). Est unu patu de sucursu mutualìsticu intre leader chi sunt minetzas in totue, francu chi in s’ispigru issoro.
Como chi su preju de su petròliu nch’est a sos 79 dòllaros, sa foto de grupu cristallizat unu momentu de unidade aparente. A cando s’àtera foto? Forsis in unu ipotèticu Galactic Maga Forum. Colunna sona? “Under pressure” e campiones in posa cun tutas ispatziales indeoradas.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
