Si s’àtera ala de s’otzèanu Donald Trump s’afidat a s’impositzione de sas manos evangèlicas pro blindare continentes e cussèntzias, in Roma b’at chie si diat acuntentare de una prus modesta impositzione de sa voluntade polìtica. Cando chi dae Palatzu de Chigi no at essidu boghe in contu de gherra (nen propostas in contu de benzina chi no ammentent sa promissa de Giorgia Meloni de nche tòddere sas atzisas), àteras duas chistiones ant animandu su sàbadu de su bidditzolu guvernativu: sa famìlia de su buscu e sos pedòfilos e istupradores illiberados dae su Cpr albanesu.
Protagonistas de ambas disgràtzias? Sos giùighes. Sos sotzial sunt càntaros dae ue brotant immàgines 4:5 pagu prus o mancu cun sa matessi gràfica, su matessi istile e sa matessi fraseologia. Si cussas immàgines poderent faeddare diant àere sa boghe de Galeazzo Bignami resende su verbu in s’istùdiu de Del Debbio (in ue, ispantu, non si faeddat prus de su politzoto de Rogoredo).
Est gasi chi su ministru Nordio a un’ala punnat a sa separatzione de sas carrieras – presentada a sos italianos belle chi esseret unu divòrtziu cunsensuale e tzivile intre acusa e giudìtziu –, ma a s’àtera dimustrat de no ischire, o de non chèrrere, manigiare sa separatzione de sos fatos dae sa propaganda. Sa majoria abbòghinat a su complotu de sas “togas rujas”, unu clàssicu istajonale chi mai at a colare de moda. E chi como cheret impreadu a ràglia sende chi s’est acurtziende sa data de su referendum.
E puru chie si siat podet bìdere chi in cussas atziones giuditziàrias non b’at una voluntade malintragnada de ingendrare caos peri sas carreras…e peri sos padentes. Sa chistione dìliga de cussos pitzinnos, pro nàrrere, ite bisòngiu b’aiat de l’istrumentalizare giughende·nche·la a sas primas pàginas e a sos talk show, mescamente si dae su matessi guvernu, duos annos e mesu a como, nd’aiat essidu unu decretu (su de Caivano) chi faeddat de galera pro babbos e mamas chi non faghent frecuentare s’iscola a sos fìgios?
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
